កំពង់ស្ពឺ៖ ក្រុមយុវពិសេសសម្តេចតេជោ និងរដ្ឋបាលស្រុកសំរោងទង បានសហការគ្នាជាមួយ អាណាព្យាបាល សិស្សានុសិស្ស រៀបចំកម្មវិធីការចែករំលែក ក្តីស្រឡាញ់និងស្នាមញញឹមលើកទី១៧ នៅថ្ងៃទី៨ ខែកុម្ភៈ ឆ្នាំ២០២៥ នៅក្នុងសាលាបឋមសិក្សាទួលស្រគំ ស្ថិតក្នុងភូមិបាក់ធ្មេញ ឃុំរលាំងចក ស្រុកសំរោងទង ខេត្តកំពង់ស្ពឺ ។

កម្មវិធីនេះមានការចូលរួមពី លោកជំទាវ ងិន លីណា រដ្ឋលេខាធិការ នៃក្រសួងបរិស្ថាន តំណាងដ៏ខ្ពង់ខ្ពស់ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន លោក ហេង សំណាង ប្រធានក្រុមយុវជនពិសេសសម្តេចតេជោ និង លោក មុត ភន អភិបាល នៃគណៈអភិបាលស្រុកសំរោងទង ព្រមទាំងសមាជិក សមាគមយុវជនខ្មែរមហានគរ សាខាខេត្ដកំពង់ស្ពឺ។

គោលបំណងនៃការនៃ«កម្មវិធីការចែករំលែកក្តី ស្រឡាញ់ និងស្នាមញញឹមលើកទី១៧» ធ្វើឡើងដើម្បីចែកសម្ភារសិក្សា ចូលរួមដាំកូនឈើ ទុកជាអនុស្សាវរីយ៍នៅជុំវិញសាលា និងដើម្បីបង្កើនគម្របបៃតង ផ្តល់ខ្យល់អាកាសបរិសុទ្ធ និងបង្កើនសោភ័ណភាពដល់សាលារៀន និងមូលដ្ឋាន។

កម្មវិធីការចែករំលែកក្តី ស្រឡាញ់ និងស្នាមញញឹមលើកទី១៧ នេះភ្ជាប់ជាមួយ កម្មវិធី «ស្តីពីការអប់រំ និងបរិស្ថាន» ដែលស្របទៅតាមគោលនយោបាយរបស់ក្រសួងបរិស្ថានក្នុងវិស័យចក្រា «ភាពស្អាត បៃតង និងចីរភាព» ដឹកនាំដោយឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន ពិសេសជាផ្នែកមួយនៃមុំយុទ្ធសាស្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ ក្រោមការដឹកនាំ ដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។

ដើម្បីប្រែក្លាយការប្តេជ្ញាចិត្តនេះ ឱ្យទៅជាសមិទ្ធផលជាក់ស្តែង ក្រសួងបរិស្ថាន បានដាក់ចេញនូវ យុទ្ធសាស្ត្រចក្រាវិស័យបរិស្ថាន ២០២៣-២០២៨ ដែលត្រូវបានរៀបចំឡើង ដោយអនុលោមតាមកម្មវិធីនយោបាយ និងយុទ្ធសាស្ត្របញ្ចកោណ ដំណាក់កាលទី១ ដើម្បីតម្រង់ទិស និងចង្អុលបង្ហាញអំពីអាទិភាពការងារ ក្នុងការលើកកម្ពស់កិច្ចគាំពារបរិស្ថាន ការការពារធនធានធម្មជាតិ និងការអភិវឌ្ឍប្រកបដោយចីរភាព ក្នុងមុំចំនួនបីចម្បង គឺ«ភាពស្អាត» «ភាពបៃតង» និង «ចីរភាព» សំដៅឆ្ពោះទៅបង្កើនគម្របព្រៃឱ្យបាន៦០% និងសម្រេចការអភិវឌ្ឍ ប្រកបដោយអព្យាក្រឹត្យកាបូន នៅឆ្នាំ២០៥០៕