ប្រធានាធិបតីចិន លោក Xi Jinping បានប្រកាសបើកព្រឹត្តិការណ៍កីឡារដូវរងាអាស៊ី (AWG) លើកទី៩ នៅក្នុងទីក្រុង Harbin ប្រទេសចិន កាលពីយប់ថ្ងៃសុក្រ (០៧ កុម្ភៈ) ក្នុងអំឡុងពេលពិធីបើកដ៏មហោឡារិកមួយដើម្បីអបអរសាទរវប្បធម៌ទឹកកក និងព្រិលដ៏សម្បូរបែបរបស់ទីក្រុង។

អ្នកទស្សនាប្រហែល ៨.០០០នាក់នៅឯមជ្ឈមណ្ឌលសន្និសីទ ពិព័រណ៍ និងកីឡាអន្តរជាតិ Harbin បានអបអរសាទរ ខណៈលោក Xi បានប្រកាសបើកកីឡានេះជាផ្លូវការ នៅចំពោះមុខឥស្សរជនដែលមកទស្សនា រួមទាំងប្រធានគណៈកម្មាធិការអូឡាំពិកអន្តរជាតិ (IOC) លោក Thomas Bach ។

ដោយប្រព្រឹត្តទៅចាប់ពីថ្ងៃទី០៧ ដល់ថ្ងៃទី១៤ ខែកុម្ភៈ ការប្រកួតកីឡារដូវរងានៅ Harbin ដែលមានបាវចនាថា "ព្រិលទឹកកបង្កប់នូវក្ដីស្រម៉ៃរួមគ្នា អាស៊ីរួមចិត្តតែមួយ" បានតំណាងឱ្យព្រឹត្តិការណ៍កីឡារដូវរងាអន្តរជាតិដ៏សំខាន់មួយទៀត ដែលរៀបចំដោយប្រទេសចិន បន្ទាប់ពីព្រឹត្តិការណ៍កីឡាអូឡាំពិករដូវរងានៅទីក្រុងប៉េកាំង ឆ្នាំ២០២២។ នេះក៏ជាលើកទីបីផងដែររបស់ប្រទេសចិន ដែលធ្វើជាម្ចាស់ផ្ទះនៃព្រឹត្តិការណ៍កីឡារដូវរងាអាស៊ី។

ព្រឹត្តិការណ៍រយៈពេល ៨ ថ្ងៃនេះ មានការប្រកួតកីឡាលើវិញ្ញាសាធំៗចំនួន៦ រួមមានវិញ្ញាសាតូចៗសរុប ៦៤វិញ្ញាសា អត្តពលិកជាង ១.២០០នាក់ មកពី ៣៤ប្រទេស និងតំបន់ក្នុងអាស៊ី ដែលបង្កើតកំណត់ត្រាក្នុងប្រវត្តិសាស្ត្រនៃព្រឹត្តិការណ៍កីឡាលើកមុនៗ ក្នុងផ្នែកបរិមាណប្រទេស និងតំបន់ និងចំនួនអត្តពលិកដែលចូលរួមការប្រកួត៕