ការធ្លាក់ព្រិលយ៉ាងខ្លាំងកម្រិតបំបែកកំណត់ត្រា បានបន្តនៅព្រឹកថ្ងៃសៅរ៍ (០៨ កុម្ភៈ) នេះ ជាចម្បងនៅតាមបណ្តោយឆ្នេរសមុទ្រជប៉ុន ដោយសារតែម៉ាស់ខ្យល់ត្រជាក់ខ្លាំងបំផុតនៃរដូវរងានេះហូរចូលទៅក្នុងបរិយាកាសផ្នែកខាងលើ ដែលបង្កការរំខានជាច្រើន ពិសេសទៅលើការធ្វើដំណើរ។

អាកាសធាតុធ្ងន់ធ្ងរនេះបានបង្កឱ្យមានផលប៉ះពាល់ដូចជាយានជំនិះជាប់គាំង និងរំខានដល់ប្រតិបត្តិការផ្លូវដែក។ យោងតាមទីភ្នាក់ងារឧតុនិយមជប៉ុនបានឱ្យដឹងថា ការធ្លាក់ព្រិលក្នុងអំឡុងពេល ១២ម៉ោង រហូតដល់ព្រឹកថ្ងៃសៅរ៍ បានឈានដល់កម្រាស់ ៥០សង់ទីម៉ែត្រនៅទីក្រុង Chuo Ward និងទីក្រុង Niigata រួមទាំងនៅកន្លែងផ្សេងទៀតក្នុងកម្រិតមិនធ្លាប់មានពីមុនមក ចាប់តាំងពីការសង្កេតស្ថិតិបានចាប់ផ្តើម។ 

ការកកកុញព្រិលក៏បាននិងកំពុងកើនឡើងផងដែរ ជាពិសេសតាមបណ្តោយឆ្នេរសមុទ្រជប៉ុន ហើយអាជ្ញាធរជំរុញអ្នកស្រុកឱ្យមានការប្រុងប្រយ័ត្នចំពោះអាកាសធាតុមិនល្អ និងស្ថានភាពផ្លូវគ្រោះថ្នាក់។

គិតត្រឹមម៉ោង ៦ព្រឹកថ្ងៃសៅរ៍នេះ យ៉ាងហោចណាស់មានរថយន្តរាប់សិបគ្រឿងបានជាប់គាំងក្នុងចរាចរណ៍ ដែលនាំឱ្យមានការកកស្ទះរហូតដល់ ៥គីឡូម៉ែត្រ មុនពេលស្ថានភាពត្រូវបានដោះស្រាយនៅម៉ោងប្រមាណ ៩ព្រឹក។ សេវារថភ្លើងល្បឿនលឿន Shinkansen ក៏រងផលប៉ះពាល់ផងដែរ ដោយមានការផ្អាក និងការពន្យារពេលជាច្រើន៕