ប្រធានាធិបតីរ្វ៉ាន់ដា លោក Paul Kagame និងសមភាគីកុងហ្គោ លោក Felix Tshisekedi បានចូលរួមកិច្ចចរចា នៅប្រទេសតង់ហ្សានី កាលពីថ្ងៃសៅរ៍ ខណៈដែលមេដឹកនាំក្នុងតំបន់ បានកោះប្រជុំក្នុងគោលបំណង ដើម្បីបញ្ចប់ជម្លោះ នៅសាធារណរដ្ឋប្រជាធិបតេយ្យកុងហ្គោ(DRC)។

ក្រុមប្រដាប់អាវុធ M23 ដែលគាំទ្រដោយប្រទេសរ្វ៉ាន់ដា បានដណ្ដើមយកទឹកដីជាច្រើន នៅភាគខាងកើត ប្រទេសកុងហ្គោ ដែលសម្បូរទៅដោយធនធានរ៉ែ នៅក្នុងការវាយលុកមួយ ដែលបានបណ្តាលឲ្យមនុស្សរាប់ពាន់នាក់ ស្លាប់ និងបានជម្លៀសមនុស្សយ៉ាងច្រើន។

ក្រុមនេះ បានដណ្តើមយកទីក្រុងយុទ្ធសាស្ត្រ Goma កាលពីសប្តាហ៍មុន ហើយកំពុងរុលចូលទៅក្នុងខេត្ត South Kivu ជាការវាយប្រហារចុងក្រោយបំផុតនៃភាពចលាចលរាប់ទសវត្សរ៍ នៅក្នុងតំបន់នេះ។

លោក Kagame បានមកចូលរួមកិច្ចប្រជុំកំពូល នៅទីក្រុង Dar es Salaam ប្រទេសតង់ហ្សានី ដែលបានប្រមូលផ្តុំប្រទេសចំនួន ៨ នៃសហគមន៍អាហ្វ្រិកខាងកើត និងសហគមន៍អភិវឌ្ឍន៍អាហ្វ្រិកខាងត្បូងដែលមានសមាជិកចំនួន ១៦។

ទោះជាយ៉ាងណាក៏ដោយ ការិយាល័យប្រធានាធិបតីកុងហ្គោ បានបញ្ជាក់កាលពីថ្ងៃសុក្រថា លោក Tshisekedi នឹងចូលរួមជំនួប តាមរយៈវីដេអូខលប៉ុណ្ណោះ។

ប្រធានាធិបតីនៃប្រទេសកេនយ៉ា សូម៉ាលី អ៊ូហ្គង់ដា ហ្សាំប៊ី ហ្ស៊ីមបាវ៉េ ក៏ស្ថិតក្នុងចំណោមអ្នកដែលមានវត្តមាន នៅពេលកិច្ចប្រជុំកំពូល បានចាប់ផ្តើម។

ចាប់តាំងពីក្រុម M23 បានកើតឡើងវិញ ក្នុងឆ្នាំ ២០២១ កិច្ចចរចាសន្តិភាពដែលរៀបចំដោយប្រទេសអង់ហ្គោឡា និងកេនយ៉ា មិនបានសម្រេច ហើយបទឈប់បាញ់ជាច្រើន បានបរាជ័យ។