យោធានៃប្រទេសស៊ូដង់ បាននិយាយកាលពីថ្ងៃសៅរ៍ថា ខ្លួនបានគ្រប់គ្រងឡើងវិញនូវសង្កាត់ដ៏សំខាន់មួយ នៅក្នុងទីក្រុងខាទុំ(Khartoum) ខណៈដែលខ្លួនបានជំរុញការរុលចូលទៅមុខរបស់ខ្លួនប្រឆាំងនឹងកងកម្លាំងយោធាប៉ារ៉ាគាំទ្ររហ័ស(RSF) ។

សង្កាត់ Kafouri នៅក្នុងទីក្រុងខាទុំខាងជើង ឬ Bahri បានស្ថិតនៅក្រោមការគ្រប់គ្រងរបស់ កងកម្លាំង RSF ចាប់តាំងពីសង្រ្គាមរវាងកងទ័ព និងទាហានប៉ារ៉ានេះ បានចាប់ផ្តើម នៅក្នុងខែមេសា ឆ្នាំ ២០២៣។

នៅក្នុងសេចក្តីថ្លែងការណ៍មួយ អ្នកនាំពាក្យយោធាលោក Nabil Abdullah បាននិយាយថា កងកម្លាំងយោធា រួមជាមួយនឹងអង្គភាពសម្ព័ន្ធមិត្តកាលពីថ្ងៃសុក្រ «បានបញ្ចប់» ការបោសសម្អាតសង្កាត់ Kafouri និងតំបន់ផ្សេងទៀត នៅក្នុងសង្កាត់ Sharq El Nil ចម្ងាយ ១៥ គីឡូម៉ែត្រពី ភាគខាងកើតនៃអ្វី ដែលលោក បានពិពណ៌នាថា ជា«អ្នកនៅសេសសល់របស់កងជីវពលភេរវករ Dagalo»។

ក្នុងប៉ុន្មានសប្តាហ៍ថ្មីៗនេះ កងទ័ព បានសម្រុកចូលនៅទូទាំងទីក្រុង Bahri ដែលជាមូលដ្ឋានរឹងមាំរបស់ កងកម្លាំងយោធាប៉ារ៉ាគាំទ្ររហ័ស(RSF) RSF ចាប់តាំងពីការចាប់ផ្តើមនៃសង្គ្រាម ដោយរុញច្រានក្រុមទាហាន ឲ្យទៅជាយក្រុងនេះ។