​បាល់ទាត់៖ ​លោក Dean Smith ដែល​ទើប​ត្រូវ​បាន​បណ្តេញ​ចេញ​ពី Aston Villa ថ្មីៗ​ នៅ​ពេល​នេះ​ត្រូវ​បាន​ប្រកាស​តែងតាំង​ជា​អ្នកចាត់ការ​ថ្មី​របស់ Norwich City ហើយ​។ ​លោក Dean Smith បាន​ចូល​មក​កាន់​តំណែង​នៅ​ក្រុម​ដែល​កំពុង​យ៉ាប់យ៉ឺន​មួយ​នេះ​បន្ត​ពី​លោក Daniel Farke ដែល​ត្រូវបាន​បណ្តេញចេញ​សប្តាហ៍​មុន​។

​​លោក Craig Shakespeare ដែល​ធ្វើការ​ជាមួយ​លោក Smith នៅ Aston Villa នោះ​ក៏​មកកាន់​តំណែង​ជំនួយការ​នៅ Norwich ជាមួយគ្នា​ដែរ​។ ​​មុន​ការមកដល់​របស់លោក Dean Smith នេះ Norwich ក៏បាន​ចរចា​ជាមួយ​អតីត​អ្នកចាត់ការ Chelsea, Frank Lampard ដែរ​តែ​ការចរចា​កាលពី​សៅរ៍​នោះ​បរាជ័យ​។ ​​សូមបញ្ជាក់ថា​ បុរស​វ័យ ៥០ឆ្នាំ Dean Smith ត្រូវបាន​ដកតំណែង​បន្ទាប់ពី Aston Villa ចាញ់ Southampton ១-០ ដែលជា​បរាជ័យ ៥ប្រកួត​ជាប់​គ្នា​នៅ English Premier League​។​ ​​នេះ​ជា​ស្ថិតិ​ចាញ់​អាក្រក់​បំផុត​របស់ Aston Villa រាប់​ពី​តាំងពី​ខែមករា ​ឆ្នាំ២០១៧ នៅ​ក្របខណ្ឌ League Championship​។

​​Aston Villa នៅពេលនេះ​ធ្លាក់ខ្លួន​ដល់​លេខ ១៥ ក្នុង​តារាង​ក្រោយ​លេង​បាន ១១ប្រកួត​នៅ​ពីលើ​តំបន់​កាត់ចោល​តែ ៣ពិន្ទុ​ប៉ុណ្ណោះ​។ ចំណែក Norwich បច្ចុប្បន្នកំពុង​វេទនា​ជាង Aston Villa ទៅទៀត​ដោយ​កំពុង​ឈរ​បាត​តារាង​មានតែ ៥ពិន្ទុ​ប៉ុណ្ណោះ​ពី​ការប្រកួត ១១លើក​៕

​អត្ថបទ​៖​នាង សុភា​វុ​ធ