សៀមរាប ៖ក្រុមអ្នកស្ម័គ្រចិត្ដអន្ដរជាតិ នៃក្រុមឡាអ៊ិនក្លឹប មកពីប្រទេសកូរ៉េខាងត្បូង តាមរយៈអង្គការមិត្ដកម្ពុជា បានផ្ដល់សម្ភាសរៈសិក្សា ការិយាល័យ និងដាំដើមឈើជាច្រើនដើម ព្រមទាំងសម្ភោធសមិទ្ធផលជាច្រើនទៀត នៅសាលារៀនចុងស្ពានឡាយអ៊ិនក្លឹប ឃុំខ្វាវ ស្រុកជីក្រែង ខេត្ដសៀមរាប ដើម្បីអភិវឌ្ឍន៍វិស័យអប់រំដល់កុមារនៅជនបទ និងឱ្យសាលារៀនមានសោភ័ណ្ឌភាព បរិស្ថានល្អ ដែលពិធីនេះ ធ្វើឡើងនៅថ្ងៃទី៨ខែកុម្ភៈឆ្នាំ២០២៥នេះ ។

​លោក គឹម ហូថេ ប្រធានក្រុមឡាយអ៊ិនក្លឹបប្រចាំឆ្នាំ២០២៥ និងក្រុមអ្នកស្ម័គ្រចិត្ដ លើកឡើងស្រដៀងគ្នាថា ការជួយអភិឌ្ឍន៍លើវិស័យអប់រំបនេះ ព្រោះចង់អភិវឌ្ឍន៍វិស័យអប់រំដល់កុមារនៅជនបទនៃប្រទេសកម្ពុជា ឱ្យកាន់តែមានភាពរីកចំរើន ខណៈដែលកុមារគឺជាទំពាំងស្នងឬស្សី។លោកបន្ដថា ក្រុមការងារស្ម័គ្រចិត្ដនៃឡាយអ៊ិនក្លឹប បានអភិវឌ្ឍន៍សាលាបឋមសិក្សាចុងស្ពាននេះ ជាច្រើនឆ្នាំមកហើយ ដែលមានសមិទ្ធិផលជាច្រើនរួមមាន អាគារសិក្សាធ្វើអំពីថ្មបីខ្នង ការិយាល័យ សាលារៀនធ្វើអំពីឈើ តុសិស្ស កៅអី ឯកសណ្ឋានសិស្សនិងសម្ភារៈសិក្សាជាច្រើនទៀត។លោកបន្ថែមថា មកដល់បច្ចុប្បន្ននេះ សាលាបឋមសិក្សាមានការរីកចំរើនគួរឱ្យកត់សំគាល់ ជាពិសេស សិស្សានុសិស្ស បានចូលរៀនត្រឹមត្រូវ និងទាន់ពេលវេលា។លោកបន្ដថា ក្រុមអ្នកស្ម័គ្រចិត្ដ នឹងនឹងបន្ដជួយអភិវឌ្ឍវិស័យអប់រំនៅកម្ពុជា ជាពិសេសនៅសាលារៀនចុងស្ពាននេះបន្ថែមទៀត ដើម្បីរិតចំណងមិត្ដភាពរវាងប្រទេសទាំងពីរ កម្ពុជា កូរ៉េ ឱ្យកាន់តែមានភាពយូរអង្វែង។

លោក លី ប៊ុនណា ប្រធានមន្ទីរអប់រំយុវជន និងកីឡា លោកបានសម្ដែងការសប្បាយរីករាយ នឹងលើកទឹកចិត្ដដល់សប្បុរសជនប្រទេសកូរ៉េខាងត្បូង ជាពិសេសអង្គការមិត្ដកម្ពុជា ដែលបានជួយគាំទ្រវិស័យអប់រំនៅខេត្ដសៀមរាបចាប់ផ្ដើមតាំងពីឆ្នាំ២០១៤មក។លោកមានប្រសាសន៍ថា វិស័យអប់រំមានតួនាទីយ៉ាងសំខាន់ ក្នុងការបណ្តុះបណ្តាលធនធានមនុស្ស សម្រាប់ធ្វើការអភិវឌ្ឍប្រទេសជាតិ។ហើយដើម្បីឱ្យកុមារបានទទួលបានការបណ្តុះបណ្តាលគ្រប់ៗគ្នា រាជរដ្ឋាភិបាលបានខិតខំធ្វើការសាងសង់អគារបង្កើតឱ្យមានសាលារៀននៅគ្រប់មូលដ្ឋាន ដើម្បីបង្កភាពងាយស្រួលដល់កុមារតូចៗក្នុងការធ្វើដំណើរទៅរៀនសូត្រ ជាពិសេសបានជួយជម្រុញឱ្យកុមារបន្ដការសិក្សារហូតដល់មធ្យមសិក្សា និងឧត្ដមសិក្សា ខណៈដែលសាលារៀននេះ មានការអភិវឌ្ឍន៍រីកចំរើនគួរឱ្យកត់សំគាល់ ដែលបានបង្កភាពស្រួលដល់កុមារតូចៗនៅតំបន់នេះបន្ថែមទៀត។លោកបានស្នើឱ្យអាណាព្យាបាល ជម្រុញដល់កុមារឱ្យទៅសិក្សាឱ្យបានគ្រប់គ្នា ដើម្បីឱ្យពួកគាត់មានសមត្ថភាពធនធានមនុស្ស ក្នុងការចូលរួមអភិវឌ្ឍន៍សង្គមជាតិ។

យោងតាមរបាយការណ៍ របស់អង្គការមិត្ដកម្ពុជា បានបង្ហាញថា សមិទ្ធិផលដែលក្រុមអន្តរជាតិឡាយអិនក្លិបតំបន់ ៣៥៧-F បានជួយអភិវឌ្ឍន៍វិស័យអប់រំ និងការរស់ប្រជាពលរដ្ឋនៅភូមិចុងស្ពាន ឃុំខ្វាវ ស្រុកជីក្រែង ចាប់តាំងពីឆ្នាំ២០១៨ ដល់ឆ្នាំ២០២៥នេះ មានការសាងសង់អាគារសិក្សា សួនកុមារ ការិយាល័យ ក្លោងទ្វា របងសាលា បន្ទប់ទឹក សាងសង់លំនៅឋានជូនប្រជាពលព្រមទាំងសមិទ្ធផលជាច្រើនទៀតដែលសរុបថវិកាអស់ប្រមាណជាង២២ម៉ឺនដុល្លា៕

អត្ថបទ៖ ឈិត​ សាវី