សៀមរាប៖នៅថ្ងៃទី០៩ ខែកុម្ភៈ ឆ្នាំ២០២៥នេះ ប្រជាពលរដ្ឋ ប្រុស ស្រី ចាស់ ក្មេង យ៉ាងច្រើនកុះករបានមកប្រមូលផ្តុំគ្នានៅបឹងអភិរក្សមួយ ស្ថិតនៅក្នុងភូមិបង្កោង ឃុំអំពិល ស្រុកប្រាសាទបាគង ខេត្តសៀមរាប នាព្រឹកថ្ងៃទី០៩ ខែកុម្ភៈ ឆ្នាំ២០២៥ ដើម្បីចាប់ត្រីរួមគ្នាយកមកធ្វើជាចង្ហាន់ប្រគេនព្រះសង្ឃ ក្នុងថ្ងៃឡើងមាឃ ឬឡើងអ្នកតា និងធ្វើម្ហូបសម្រាប់គ្រួសារ ព្រមទាំងទទួលភ្ញៀវ ដែលជាទំនៀមទម្លាប់របស់ប្រជាពលរដ្ឋរស់នៅតំបន់រមណីយដ្ឋានអង្គរ ប្រារព្ធធ្វើជារៀងរាល់ឆ្នាំ។ 

អ្នកស្រុកអង្គររាប់រាប់រយនាក់ បានរួមគ្នាចាប់ត្រីប្រពៃណីបុរាណរបស់ពួកគាត់ នៅក្នុងបឹងសហគមន៍ ដែលត្រូវបានអភិរក្ស ថែរក្សាដោយគណៈកម្មាការក្នុងភូមិ សម្រាប់យកធ្វើម្ហូបអាហារ ឬធ្វើទឹកសម្លរនំបញ្ចុកនៅក្នុងពិធីឡើងមាឃនោះ។ ពិធីនេះ ជារបស់ប្រជាពលរដ្ឋរស់នៅភូមិបង្កោង ក្នុងតំបន់អង្គរ ស្ថិតនៅស្រុកប្រាសាទបាគង បានប្រកាន់ភ្ជាប់យ៉ាងខ្ជាប់ខ្ជួន តាំងពីបុរាណមកមិនដែលខកខានឡើយ។ 

ពិធីចាប់ត្រីរួមគ្នានៅឆ្នាំ២០២៥នេះ មិនខុសប្លែកពីរាល់ៗឆ្នាំប៉ុន្មានឡើយ ប៉ុន្ដែជាការលើកស្ទួយវប្បធម៌ប្រពៃណី ទំនៀមទម្លាប់របស់ពួកគាត់ តាំងពីបុរាណមក៕