ប្រធានាធិបតីអ៊ុយក្រែនលោក វ្ល៉ូឌីមី ហ្សេឡិនស្គី បានថ្លែងកាលពីថ្ងៃសៅរ៍ថា ទីក្រុងគីវ ចង់ឲ្យសម្ព័ន្ធមិត្ត វិនិយោគលើធនធានរ៉ែរបស់ខ្លួន បន្ទាប់ពីប្រធានាធិបតីអាមេរិក ដូណាល់ ត្រាំ ( Donald Trump) បានស្នើសុំ «ធនធានកម្រ» ជាថ្នូរនឹងជំនួយយោធា។

លោក ហ្សេឡិនស្គី បានបង្ហោះនៅលើប្រព័ន្ធផ្សព្វផ្សាយសង្គម ដោយដកស្រង់ចម្លើយដែលលោកបានផ្តល់ នៅក្នុងបទសម្ភាសន៍ ជាមួយទីភ្នាក់ងារព័ត៌មានរ៉យទ័រថា៖«យើងមានធនធានរ៉ែ។ នេះមិនមែនមានន័យថា យើងផ្តល់ឲ្យពួកវា ទៅនរណាម្នាក់នោះទេ សូម្បីតែដៃគូយុទ្ធសាស្ត្រក៏ដោយ»។  

លោកបានថ្លែងថា៖«បើនិយាយអំពីភាពជាដៃគូ សូមដាក់លុយរបស់អ្នក ដើម្បីវិនិយោគ។ ចូរយើងអភិវឌ្ឍន៍លើធនធានទាំងជាមួយគ្នា ហើយរកលុយទាំងអស់គ្នា។

លោក ត្រាំ បាននិយាយនៅសប្តាហ៍នេះថា សហរដ្ឋអាមេរិក កំពុងស្វែងរកកិច្ចព្រមព្រៀង ជាមួយអ៊ុយក្រែន ជាកន្លែងដែលពួកគេ នឹងធានានូវអ្វីដែលយើងកំពុងផ្តល់ឲ្យពួកគេជាមួយនឹងធនធានរ៉ែដ៏កម្រ និងរបស់ផ្សេងៗទៀត»។

ដោយដកស្រង់សម្តីរបស់ខ្លួន ក្នុងបទសម្ភាសន៍ជាមួយសារព័ត៌មានរ៉យទ័រ លោក ហ្សេឡិនស្គី បាននិយាយថា ទ្រព្យសម្បត្តិរ៉ែរបស់អ៊ុយក្រែនមានតម្លៃ «រាប់ពាន់លានដុល្លារ» ដោយលើកឡើងពីធនធានមានតម្លៃរបស់ខ្លួនគឺ ទីតានីញ៉ូម និងអ៊ុយរ៉ានីញ៉ូម ដែលលោកបានពិពណ៌នាថា មានច្រើនជាងគេបំផុត នៅអឺរ៉ុប។