បងប្អូនប្រជាពលរដ្ឋ ក៏ដូចជាភ្ញៀវជាតិ និងអន្តរជាតិជាច្រើន បានបន្តនាំគ្នាទៅដើរលេងកម្សាន្ត នៅលើ​ផ្លូវថ្មើរជើងថ្មី (Walk street) ក្នុងសប្តាហ៍ទី២ ។

នាព្រលប់ថ្ងៃអាទិត្រ ថ្ងៃទី០៩ ខែកុម្ភៈ ឆ្នាំ២០២៥ម្សិលមិញនេះ ដែលជាថ្ងៃទី០៤ ក្នុង​សប្តាហ៍​ទី២ នៃការដាក់ឱ្យដំណើរការសាកល្បងផ្លូវថ្មើរជើងថ្មី (Walk street) គេសង្កេតឃើញកំណើន នៃ​ការចូលទៅដើរលេងកម្សាន្តកាន់តែអ៊ូរអរ និងកុះករបំផុត បន្ទាប់ពីប្រជាពលរដ្ឋ និង​បណ្តា​ភ្ញៀវ​ជាតិ​-អន្តរជាតិ បានទទួលព័ត៌មានកាន់តែទូលំទូលាយ អំពីការ​បើក​ដំណើរ​ការ​ផ្លូវ​ជា​បណ្តោះ​អាសន្ន នៅតំបន់ដែលមានការទាក់ទាញទស្សនីយ៍ភាពដ៏សម្ខាន់ ក្នុងរាជធានីភ្នំពេញមួយនេះ ។

ឯកឧត្តមឃួង ស្រេង អភិបាលរាជធានីភ្នំពេញ បានប្រាប់ឱ្យដឹងថា ត្បិត២សប្តាហ៍មកនេះ ជា​ការ​ដាក់​ដំណើរការសាកល្បងក៏ពិតមែន ប៉ុន្តែពី១សប្តាហ៍ទៅ១សប្តាហ៍ កំណើន​ទេសចរណ៍​កាន់​តែ​កើន​ឡើង​ជាបន្តបន្ទាប់ ។ ខណះភ្ញៀវកាន់តែមកកម្សាន្តច្រើនផងនោះ កិច្ចការងារ​សន្តិសុខ​សុវត្ថិភាព​ របៀបរៀបរយសាធារណះ ក៏ដូចជាបរិស្ថានអនាម័យ ក៏ជាការងា​រ​ស្នូល​ដ៏​សម្ខាន់​របស់​អាជ្ញាធរ​រាជធានីដែលចាំបាច់ត្រូវគិតគូរ និងរក្សាឱ្យបានផងដែរ ។

ពលរដ្ឋ សម្តែងការពេញចិត្ត និងគាំទ្រ ចំពោះការរៀបចំឱ្យមានផ្លូវង្មើរជើងថ្មីនេះ ដែល​បាន​ផ្តល់​នូវ​ទី​ធ្លា​ដ៏ធំទូលាយ អាចអនុញ្ញាត្តិឱ្យមនុស្សម្នាក់ទូទៅជាច្រើន បានដើរលេងកម្សាន្ត ក៏ដូច​ជា​ហាត់​ប្រាណ នាថ្ងៃល្ងាចឡើងរៀងរាល់ចុងសប្តាហ៍ ដោយមិនព្រួយបារម្ភពីឡាន ឬម៉ូតូ​បើក​ឆ្លង​កាត់​លើ​ដ​​ងផ្លូវ។

សូមបញ្ជាក់ថា ផ្លូវថ្មើរជើងថ្មី (Walk street) នឹងដាក់ឱ្យដំណើរការសាកល្បងតែ០២ថ្ងៃប៉ុណ្ណោះ ក្នុង១សប្តាហ៍ គឺនៅរៀងរាល់ថ្ងៃសៅរិ៍ និងថ្ងៃអាទិត្រ ។

ការដាក់ឱ្យដំណើរការសាកល្បងក្នុងជំហានដំបូងនេះ គឺត្រូវបិទលំហូរចរាចរណ៍​នៅ​លើ​តីរ​វិថី​ព្រះ​ស៊ីសុវត្ថិ ដោយគិតចាប់ពីវិថីបក្សីចាំក្រុង ( ផ្លូវលេខ៩៤ ) រហូតដល់ខាងមុខព្រះបរមរាជវាំង ក្នុង​ភូមិ​សាស្ត្រខណ្ឌដូនពេញ ៕ អត្ថបទ ៖ លីហេង