រដ្ឋមន្ត្រីប្រចាំរដ្ឋ Manipur ភាគឦសានប្រទេសឥណ្ឌា បានលាលែងពីតំណែង កាលពីថ្ងៃអាទិត្យ ដោយចុះចាញ់ចំពោះសម្ពាធដើម្បីឲ្យលោកលាលែងពីតំណែង ក្នុងពេលមានការប៉ះទង្គិចគ្នារវាងជនជាតិភាគតិចដែលនៅតែបន្ត បណ្តាលឲ្យមនុស្សយ៉ាងហោចណាស់២៥០នាក់ស្លាប់ ចាប់តាំងជម្លោះបានផ្ទុះឡើងជិត២ឆ្នាំមកនេះ។

លោក N Biren Singh សមាជិកនៃគណបក្ស Bharatiya Janata (BJP) របស់នាយករដ្ឋមន្ត្រី លោក Narendra Modi បានដាក់ស្នើលាលែងពីតំណែងរបស់លោកទៅកាន់អភិបាលរដ្ឋ ក្នុងទីក្រុង Imphal មួយថ្ងៃ មុនសម័យប្រជុំសភា។

យោងតាមសេចក្តីថ្លែងការណ៍បានឱ្យដឹងថា អភិបាលរដ្ឋបានទទួលយកការលាលែងពីតំណែងរបស់លោក Singh ហើយបានស្នើសុំឱ្យលោក បន្តរហូតដល់ការរៀបចំជំនួស ត្រូវបានធ្វើឡើង។

ការលាលែងពីតំណែងរបស់លោក Singh ធ្វើឡើងបន្ទាប់ពីមានការប៉ះទង្គិចគ្នាខ្លាំង រវាងសហគមន៍ Meitei និងជនជាតិភាគតិច Kuki ជុំវិញអត្ថប្រយោជន៍សេដ្ឋកិច្ច និងកូតាការងារ។ ជម្លោះនេះ បានបណ្តាលឲ្យមនុស្សយ៉ាងហោចណាស់២៥០នាក់ស្លាប់និងមនុស្ស៦០០.០០០នាក់ភៀសខ្លួនចេញ ដោយសារតែអំពើហិង្សាជាបន្តបន្ទាប់។

ក្រុមជនជាតិភាគតិច Kuki បានចោទប្រកាន់លោក Singh ជាយូរមកហើយពីភាពលំអៀងរបស់លោកទៅរកសហគមន៍ Meitei ហើយបានទាមទារឱ្យដកលោកចេញចាប់តាំងពីជម្លោះបានចាប់ផ្តើម។