បេឡារុស៖ ប្រព័ន្ធផ្សព្វផ្សាយរដ្ឋបេឡារុសបានរាយការណ៍កាលពីថ្ងៃអាទិត្យថា ក្រុមជនអន្តោប្រវេសន៍ប្រហែល ៦០នាក់ដែលបានឆ្លងកាត់ព្រំដែនចូលទៅក្នុងប្រទេសប៉ូឡូញ ត្រូវបានអមដោយឆ្មាំព្រំដែនប៉ូឡូញហើយបានបណ្ដេញត្រឡប់ទៅប្រទេសបេឡារុសវិញ។ វីដេអូដែលចាក់ផ្សាយដោយទូរទស្សន៍រដ្ឋរបស់រុស្ស៊ី បានបង្ហាញពីក្រុមជនអន្តោប្រវេសន៍ដែលកំពុងបោះជំរំតង់ នៅជិតព្រំដែនប៉ូឡូញហ៊ុមព័ទ្ធដោយរបងបន្លាលួស។
ប្រភពមួយទៀត៖ ទូរទស្សន៍រដ្ឋបេឡារុសបានបង្ហាញវីដេអូ នៃក្រុមមន្ត្រីកាកបាទក្រហមបេឡារុសកំពុងចែកចាយអាហារ និងការផ្គត់ផ្គង់ដល់ជនអន្តោប្រវេសន៍នៅព្រំដែនជាប់ជាមួយប៉ូឡូញកាលពីថ្ងៃអាទិត្យ។ កាកបាទក្រហមបេឡារុសបាននិយាយនៅក្នុងសេចក្ដីថ្លែងការណ៍មួយថា ខ្លួនបានបង្កើតតង់កំដៅចំនួនបីនៅព្រំដែនដើម្បីផ្តល់ការផ្គត់ផ្គង់ដល់កុមារ ស្ត្រីដែលមានកូន និងស្ត្រីមានផ្ទៃពោះ។ គ្រឿងផ្គត់ផ្គង់រួមមានអាហារ ភួយ និងខោទឹកនោមក្មេង។ ក្រុមជនអន្តោប្រវេសន៍ និងជនភៀសខ្លួនរាប់ពាន់នាក់ដែលភាគច្រើនមកពីមជ្ឈិមបូព៌ា បានប្រមូលផ្តុំគ្នានៅចំហៀងខាងក្នុងដឹកដីបេឡារុសជាប់ព្រំដែនជាមួយប៉ូឡូញ ក្នុងប៉ុន្មានសប្តាហ៍ថ្មីៗនេះក្នុងក្តីសង្ឃឹមថានឹងបានឆ្លងចូលទៅក្នុងទឹកដីសហភាពអឺរ៉ុប។
ខណៈពិភពលោកផ្តោតអារម្មណ៍លើជនអន្តោប្រវេសន៍ នៅចំកណ្តាលនៃការប្រឈមមុខគ្នាដ៏តានតឹងរវាងប៉ូឡូញ និងបេឡារុស ក្រុមជនអន្តោប្រវេសន៍ដែលកំពុងបានជាប់គាំងនៅតាមព្រំដែនរវាងបូស្នៀ និងក្រូអាតកាលពីចុងសប្ដាហ៍មុនបានអំពាវនាវឱ្យពិភពលោកកុំភ្លេចពួកគេ។ គ្រួសារទាំងមូលដែលមានកូនតូចៗ ក៏ដូចជាស្ត្រីមានផ្ទៃពោះបានបោះជំរំនៅជិតទីប្រជុំជន Velika Kladusa ស្នាក់នៅក្នុងសីតុណ្ហភាពទាប ហើយត្រូវព្យាយាមរស់នៅក្នុងជីវិតពេលយប់ក្រោមសន្សើម និងអាកាសធាតុត្រជាក់នៅរដូវស្លឹកឈើជ្រុះ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
