នាយករដ្ឋមន្ត្រីអ៊ីស្រាអែល លោក Benjamin Netanyahu នៅថ្ងៃអាទិត្យ (០៩ កុម្ភៈ) បានលើកសរសើរជាថ្មីម្ដងទៀតលើសំណើរបស់លោកប្រធានាធិបតី Donald Trump ដែលថាឱ្យសហរដ្ឋអាមេរិក ជាអ្នកគ្រប់គ្រងលើដែនដីហ្កាហ្សា និងការផ្លាស់ទីលំនៅរបស់ប្រជាជនប៉ាឡេស្ទីន ថាជា "បដិវត្តន៍" បន្ទាប់ពីការវិលត្រឡប់របស់លោកទៅកាន់អ៊ីស្រាអែល ពីទស្សនកិច្ចទីក្រុងវ៉ាស៊ីនតោន។

លោក Trump បានបង្កឱ្យមានការខឹងសម្បារជាសកលជុំវិញការស្នើឡើងក្នុងអំឡុងពេលដំណើរទស្សនកិច្ចមួយសប្តាហ៍ដោយនាយករដ្ឋមន្ត្រីអ៊ីស្រាអែលទៅកាន់អាមេរិក ថាទីក្រុងវ៉ាស៊ីនតោនគួរតែគ្រប់គ្រងតំបន់ហ្កាហ្សាស្ទ្រីប និងបោសសំអាតប្រជាជននៅដែនដីនេះ។

ក្នុងការវិលត្រឡប់ទៅកាន់អ៊ីស្រាអែលវិញ លោក Netanyahu បានថ្លែងទៅកាន់គណៈរដ្ឋមន្ត្រីរបស់លោកថា សម្ព័ន្ធមិត្តទាំងពីរបានព្រមព្រៀងគ្នាលើគោលដៅសង្គ្រាមដែលកំណត់ដោយអ៊ីស្រាអែលនៅពេលចាប់ផ្តើមសង្រ្គាម ១៥ខែរបស់ខ្លួនប្រឆាំងនឹងក្រុមហាម៉ាស រួមទាំង "ធានាឱ្យតំបន់ហ្កាហ្សា លែងជាបង្កការគំរាមកំហែងដល់អ៊ីស្រាអែលទៀត"។ លោកបន្ថែមថា "លោកប្រធានាធិបតី Trump មានចក្ខុវិស័យខុសប្លែក និងកាន់តែប្រសើរសម្រាប់អ៊ីស្រាអែល ដែលជាវិធីសាស្រ្តបដិវត្តន៍ និងភាពច្នៃប្រឌិត"។

ទោះបីជាមានការរិះគន់ពីសម្ព័ន្ធមិត្តអន្តរជាតិ និងជាពិសេសពីរដ្ឋអារ៉ាប់ក៏ដោយ លោក Trump កាលពីសប្ដាហ៍មុនបានបញ្ជាក់ឡើងវិញថា "តំបន់ហ្កាហ្សាស្ទ្រីប នឹងត្រូវបានប្រគល់ឱ្យអាមេរិក ដោយអ៊ីស្រាអែល នៅពេលបញ្ចប់ការប្រយុទ្ធ"៕