ពាណិជ្ជករជាច្រើននៅក្នុងមជ្ឈមណ្ឌលផលិតកម្មនាំចេញ អ៊ីវូ (Yiwu) របស់ប្រទេសចិន កាលពីថ្ងៃអាទិត្យ (០៩ កុម្ភៈ) បានច្រានចោលការដំឡើងពន្ធគយ និងជំហរទប់ទល់នឹងចិនរបស់លោកប្រធានាធិបតីអាមេរិក Donald Trump ដោយអ្នកខ្លះបាននិយាយដោយមិនព្រួយបារម្ភថា ពួកគេបានត្រៀមលក្ខណៈរួចរាល់ដើម្បីទប់ទល់ការវាយប្រហារនានាលើអាជីវកម្ម។

ទីក្រុង Yiwu ក្នុងខេត្តជឺជាំង (Zhejiang) ភាគខាងកើតប្រទេសចិន គឺជាមជ្ឈមណ្ឌលលក់ដុំដ៏ធំបំផុតរបស់ពិភពលោក សម្រាប់ទំនិញផលិតខ្នាតតូចជាច្រើន ដែលនាំចេញផលិតផលនានារាប់ចាប់ពីដើមណូអែល រហូតដល់គ្រឿងលម្អអលង្ការទូទាំងពិភពលោក រួមទាំងទៅកាន់សហរដ្ឋអាមេរិកផងដែរ។

លោក Cheng Haodong ប្រធានក្រុមហ៊ុន Beisi Group ដែលជាអាជីវកម្មបោះដុំរាប់ចាប់ពីសម្លៀកបំពាក់ ទៅដល់ដបទឹក បាននិយាយថា "យើងបានព្យាករថាលោក Trump នឹងឡើងកាន់អំណាច ហើយយើងក៏បានរៀបចំត្រៀមខ្លួនទប់ទល់ទុកជាមុនផងដែរ។ ពាណិជ្ជករតាមដានស្ថានការណ៍នោះ ហើយក៏បានបង្កើតរោងចក្រថ្មីមួយក្នុងរដ្ឋ Tennessee សហរដ្ឋអាមេរិក កាលពីខែមេសា ដើម្បីបញ្ចៀសពន្ធ”។

យុទ្ធនាការរបស់លោក Trump បានសន្យាថានឹងដំឡើងពន្ធ ៦០% លើការនាំចូលរបស់ចិន មុនពេលជាប់ឆ្នោត ប៉ុន្តែក្រោយមក លោកកែមកត្រឹម ១០% បន្ទាប់ពីចូលកាន់តំណែង ដែលនាំឱ្យមានការដាក់ពន្ធសងសឹកពីទីក្រុងប៉េកាំង។ លោកក៏មានគម្រោងលុបចោលការលើកលែងពន្ធពិសេសលើកញ្ចប់ឥវ៉ាន់តម្លៃទាបពីចិនផងដែរ៕