ប្រទេសជាច្រើននៅមជ្ឈិមបូព៌ាកាលពីថ្ងៃអាទិត្យ បានថ្កោលទោសចំពោះការលើកឡើងរបស់នាយករដ្ឋ មន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) ស្តីពីការបង្កើតរដ្ឋប៉ាឡេស្ទីន នៅលើទឹកដីអារ៉ាប៊ីសាអ៊ូឌីត។

ការអត្ថាធិប្បាយរបស់លោក ណេតាន់យ៉ាហ៊ូ ដែលធ្វើឡើងក្នុងបទសម្ភាសន៍មួយ កាលពីថ្ងៃព្រហស្បតិ៍ជាមួយប៉ុស្តិ៍ទូរទស្សន៍ Channel 14 របស់អ៊ីស្រាអែល បានផ្តល់យោបល់ថា៖«អារ៉ាប៊ីសាអ៊ូឌីត អាចបង្កើតរដ្ឋប៉ាឡេស្ទីន នៅក្នុងប្រទេសអារ៉ាប៊ីសាអ៊ូឌីត ដោយសារពួកគេមានដីច្រើន នៅទីនោះ»។

ក្រសួងការបរទេសអារ៉ាប៊ីសាអ៊ូឌីត បានបញ្ជាក់នៅក្នុងសេចក្តីថ្លែងការណ៍មួយថា ព្រះរាជាណាចក្រនេះបដិសេធសេចក្តីថ្លែងការណ៍បែបនេះ ដែលមានគោលបំណងបង្វែរការយកចិត្តទុកដាក់ចេញពី«ឧក្រិដ្ឋកម្មជាបន្តបន្ទាប់» ដែលប្រព្រឹត្តដោយអ៊ីស្រាអែល។

ព្រះរាជាណាចក្រនេះ បានសង្កត់ធ្ងន់ថា ប្រជាជនប៉ាឡេស្ទីន មានសិទ្ធិលើទឹកដីរបស់ពួកគេ ហើយសន្តិភាពយូរអង្វែង អាចសម្រេចបាន ដោយការត្រឡប់ទៅរកហេតុផល និងទទួលយកគោលការណ៍នៃទំនាក់ទំនងសន្តិសហវិជ្ជមាន តាមរយៈដំណោះស្រាយរដ្ឋពីរ។

នៅក្នុងសេចក្តីថ្លែងការណ៍មួយ ក្រសួងការបរទេសអ៊ីរ៉ាក់ បានលើកឡើងថា ការអត្ថាធិប្បាយរបស់លោក ណេតាន់យ៉ាហ៊ូ គឺជាការរំលោភយ៉ាងធ្ងន់ធ្ងរលើអធិបតេយ្យភាពរបស់អារ៉ាប៊ីសាអ៊ូឌីត និងជាការរំលោភលើសិទ្ធិស្របច្បាប់របស់ប្រជាជនប៉ាឡេស្ទីន បន្ថែមពីលើការរំលោភលើវិធាននៃច្បាប់អន្តរជាតិ និងធម្មនុញ្ញអង្គការសហប្រជាជាតិ។