ប្រភពលើកឡើងថា ឥណ្ឌាកំពុងតែពិភាក្សាជាមួយសហរដ្ឋអាមេរិក សម្រាប់ការទិញ និងសហការផលិតយានធ្វើសឹក រួមទាំងដើម្បីបញ្ចប់កិច្ចព្រមព្រៀងម៉ាស៊ីនយន្តហោះចម្បាំង ខណៈលោកនាយករដ្ឋមន្រ្តី Narendra Modi ជួបជាមួយប្រធានាធិបតីអាមេរិក លោក Donald Trump ក្នុងសប្ដាហ៍នេះ។

ឥណ្ឌា ដែលជាប្រទេសនាំចូលអាវុធធំជាងគេលើពិភពលោក តាមទម្លាប់គឺពឹងផ្អែកជាចម្បងលើរុស្ស៊ី ប៉ុន្តែកាលពីខែមុន លោក Trump ស្នើឱ្យលោក Modi ដែលធ្វើដំណើរទៅក្រុងវ៉ាស៊ីនតោននៅថ្ងៃពុធ (១២ កុម្ភៈ) សម្រាប់ទស្សនកិច្ច ២ថ្ងៃ ឱ្យទិញឧបករណ៍សុវត្ថិភាពដែលផលិតដោយអាមេរិកបន្ថែមទៀត ហើយផ្លាស់ទី "ឆ្ពោះទៅរកទំនាក់ទំនងពាណិជ្ជកម្មដោយយុត្តិធម៌"។

ឥណ្ឌា និងអាមេរិក បានពិភាក្សាគ្នាយូរមកហើយលើការសហការផលិតយានប្រយុទ្ធ Stryker ដែលផលិតដោយក្រុមហ៊ុន General Dynamics និងត្រូវបានប្រើប្រាស់ដោយកងទ័ពអាមេរិក។ ប្រភពបន្ថែមថា សម្ព័ន្ធមិត្តទាំងពីរក៏កំពុងប្រឹងប្រែងបញ្ចប់កិច្ចពិភាក្សាលើការសន្យាសហការផលិតម៉ាស៊ីនយន្តហោះចម្បាំងនៅឥណ្ឌា សម្រាប់កងទ័ពអាកាសឥណ្ឌា ដែលជាកិច្ចសន្យាមួយមានតាំងពីឆ្នាំ២០២៣។

គេមិនច្បាស់ភ្លាមៗថាតើលទ្ធភាពនៃកិច្ចព្រមព្រៀងទាំងពីរនឹងមាននៅក្នុងកិច្ចពិភាក្សារវាងលោក Modi និងលោក Trump ដែរឬទេ។ ក្រសួងការបរទេសឥណ្ឌា និយាយថា ពាណិជ្ជកម្ម កិច្ចសហប្រតិបត្តិការលើវិស័យការពារជាតិ និងបច្ចេកវិទ្យាគឺស្ថិតក្នុងចំណោមបញ្ហាដែលត្រូវពិភាក្សា៕