កងកម្លាំងអ៊ីស្រាអែល បានពង្រីកប្រតិបត្តិការយោធារបស់ពួកគេ នៅតំបន់វេសបែង (West Bank) កាលពីថ្ងៃអាទិត្យ ដោយបើកការវាយឆ្មក់មួយ នៅក្នុងជំរំជនភៀសខ្លួន Nur Shams។

កងកម្លាំងការពារអ៊ីស្រាអែល (IDF) បាននិយាយនៅក្នុងសេចក្តីថ្លែងការណ៍មួយថា កងកម្លាំងជាច្រើន មកពី IDF ទីភ្នាក់ងារសន្តិសុខ Shin Bet និងនគរបាលព្រំដែន បានចាប់ផ្តើមប្រតិបត្តិការពេញមួយយប់នៅជំរំ Nur Shams។ ជំរំនេះ មានទីតាំងនៅក្នុងរដ្ឋបាលខេត្ត Tulkarm នៅភាគពាយព្យនៃតំបន់វេសបែង គឺជាចំណុចបង្គោលនៃការវាយប្រហារនាពេលថ្មីៗនេះ។

យោធាបានអះអាងថា កងកម្លាំងរបស់ខ្លួន បានបាញ់សម្លាប់ក្រុមសកម្មប្រយុទ្ធជាច្រើននាក់ និងចាប់ខ្លួនបុគ្គលមួយចំនួនទៀត។

ក្រសួងសុខាភិបាលប៉ាឡេស្ទីន បានរាយការណ៍ថា ស្ត្រីមានផ្ទៃពោះម្នាក់ បានស្លាប់ ដោយការបាញ់ប្រហាររបស់អ៊ីស្រាអែល។ អង្គការអឌ្ឍចន្ទក្រហម បាននិយាយថា មនុស្សពីរនាក់ផ្សេងទៀត ត្រូវបានបាញ់ និងរងរបួសយ៉ាងធ្ងន់ធ្ងរ។

រដ្ឋមន្ត្រីការពារជាតិអ៊ីស្រាអែល លោក Israel Katz បាននិយាយនៅក្នុងសេចក្តីថ្លែងការណ៍មួយថា ប្រតិបត្តិការនេះ មានគោលបំណង«កម្ទេចហេដ្ឋារចនាសម្ព័ន្ធភេរវកម្ម» នៅតំបន់វេសបែង។

យោធាអ៊ីស្រាអែល បានចាប់ផ្តើមយុទ្ធនាការធំ នៅទីក្រុង Jenin នៅថ្ងៃទី ២១ ខែមករា ហើយបានពង្រីកវាកាលពីសប្តាហ៍មុន ទៅកាន់ទីប្រជុំជន Tamun ភាគអាគ្នេយ៍នៃទីក្រុងនេះ។