ប្រធានាធិបតីអាមេរិក លោក Donald Trump កាលពីថ្ងៃអាទិត្យ (ទី៩ ខែកុម្ភៈ) បានលើកឡើងថា សហរដ្ឋអាមេរិក អាចនឹងជំពាក់បំណុលមិនច្រើនដូចការគិតនោះទេ ហើយបាននិយាយថា វាអាចបណ្តាលមកពីការក្លែងបន្លំ ទាក់ទងនឹងការសងបំណុល។

លោក Trump បានធ្វើការអត្ថាធិប្បាយរបស់លោកបែបនេះទៅកាន់អ្នកសារព័ត៌មាន នៅលើយន្តហោះ Air Force One ខណៈពេលដែលកំពុងហោះហើរទៅមើលកម្មវិធីប្រកួត Super Bowl ក្នុងទីក្រុង New Orleans។

គួរបញ្ជាក់ថា បើយោងតាមរតនាគាររបស់សហរដ្ឋអាមេរិក ដែលដើរតួនាទីយ៉ាងសំខាន់ នៅក្នុងប្រព័ន្ធហិរញ្ញវត្ថុពិភពលោក បានឲ្យដឹងថា បច្ចុប្បន្ននេះ សហរដ្ឋអាមេរិកមានបំណុលសាធារណៈចំនួន ៣៧សែនកោដិដុល្លារ ដែលមិនទាន់សង។

លោក Trump បានប្រគល់ភារកិច្ចឲ្យលោកមហាសេដ្ឋី Elon Musk រុះរើរដ្ឋាភិបាលសហព័ន្ធទ្រង់ទ្រាយធំ ដែលបានបង្កឲ្យមានការតវ៉ាតាមដងផ្លូវក្នុងទីក្រុងវ៉ាស៊ីនតោន និងការចោទប្រកាន់ថា រដ្ឋបាលរបស់លោក Trump កំពុងបំពានច្បាប់។ កាលថ្ងៃទី៩ ខែកុម្ភៈ លោក Trump បានប្រាប់អ្នកយកព័ត៌មាននៅលើយន្តហោះ Air Force One ថា៖ «យើងកំពុងពិនិត្យមើលរតនាគារ។ វាអាចមានបញ្ហា។ អ្នកបានដឹងអំពីរឿងនោះពីរតនាគារ ហើយនោះអាចជាបញ្ហាគួរឲ្យចាប់អារម្មណ៍»។

លោក Trump បានបន្ថែមពាក់ព័ន្ធនឹងរតនាគារថា៖ «វាអាចមានរឿងជាច្រើនដែលមិនត្រូវបានរាប់បញ្ចូល។ ម្យ៉ាងវិញទៀត ករណីមួយចំនួនដែលយើងកំពុងរកឃើញ គឺជាការក្លែងបន្លំ ដូច្នេះប្រហែលជាយើងមានបំណុលតិចជាងការគិតរបស់យើង»៕