អង្គការសហប្រជាជាតិ នៅថ្ងៃចន្ទនេះ បានចោទប្រកាន់កងកម្លាំងយោធាប៉ារ៉ាគាំទ្ររហ័ស(RSF)របស់ស៊ូដង់ថា បានរាំងខ្ទប់ជំនួយមិនឲ្យចូលទៅ តំបន់ Darfur ដែលគំរាមកំហែងដោយទុរ្ភិក្សរបស់ប្រទេស ដែលហែកហួរដោយសង្រ្គាមនេះ។

កងកម្លាំង RSF ដែលបានធ្វើសង្រ្គាមជាមួយកងទ័ពធម្មតា ចាប់តាំងពីខែមេសា ឆ្នាំ ២០២៣ គ្រប់គ្រងស្ទើរតែទាំងអស់នៃតំបន់ Darfur ជាតំបន់ភាគខាងលិចដែលមានទំហំស្មើនឹងប្រទេសបារាំង។

ចាប់តាំងពីខែឧសភាមក កងកម្លាំង RSF បានឡោមព័ទ្ធទីក្រុង El-Fasher នៃរដ្ឋNorth Darfur និងបានវាយប្រហារជំរំភៀសខ្លួន នៅក្បែរនោះ។

អ្នកស្រី Clementine Nkweta-Salami អ្នកសម្របសម្រួលក្នុងតំបន់និងមនុស្សធម៌របស់អង្គការសហប្រជាជាតិនៅស៊ូដង់ បាននិយាយថា៖«ការរឹតបន្តឹងជាប់លាប់ និងឧបសគ្គដ៏ស្មុកស្មាញ» ដែលដាក់ដោយទីភ្នាក់ងារមនុស្សធម៌របស់កងកម្លាំងយោធាប៉ារ៉ាគាំទ្ររហ័ស(RSF) «កំពុងរារាំងជំនួយសង្គ្រោះជីវិត មិនឲ្យទៅដល់អ្នកដែលត្រូវការ ដោយអស់សង្ឃឹមនោះ»។