អធិការបតីអាល្លឺម៉ង់ លោក Olaf Scholz បានពណ៌នាការលើកឡើងរបស់លោកប្រធានាធិបតី ដូណាល់ ត្រាំ (Donald Trump) ថា សហរដ្ឋអាមេរិក អាចកាន់កាប់តំបន់ហ្កាហ្សាស្ទ្រីប ផ្លាស់ប្តូរទីតាំងប្រជាជនរបស់ខ្លួន និងរៀបចំវាឡើងវិញជា «រឿងអាស្រូវ» នៅក្នុងការជជែកពិភាក្សាមុនការបោះឆ្នោត កាលពីថ្ងៃអាទិត្យ។ គូប្រជែងសំខាន់របស់លោក ក៏បានសម្តែងការមិនសប្បាយចិត្តដែរ ប៉ុន្តែបានបញ្ជាក់ថា មាន«វោហាស័ព្ទជាច្រើន» ចេញមកពីទីក្រុងវ៉ាស៊ីនតោន។

លោក Scholz ជាអ្នកឆ្វេងកណ្តាលនិយម និងគូប្រជែងស្តាំកណ្តាលនិយម លោក Friedrich Merz ដែលជាអ្នកនាំមុខគេ ក្នុងការបោះឆ្នោតថ្ងៃទី ២៣ ខែកុម្ភៈ បានពិភាក្សាអំពីបញ្ហាក្នុងស្រុកសំខាន់ៗ ដូចជាសេដ្ឋកិច្ចដែលកំពុងជួបការលំបាក និងការទេសន្តរប្រវេសន៍ នៅក្នុងប្រទេសអាល្លឺម៉ង់ ហើយក៏បានលើកឡើងពីគោលនយោបាយការបរទេសរយៈពេលបីសប្តាហ៍ ក្នុងអាណត្តិថ្មីរបស់លោក ត្រាំ។

នៅពេលសួរថាតើលោកបានធ្វើអ្វីខ្លះចំពោះសំណើរបស់លោក ត្រាំ ដើម្បីធ្វើការអភិវឌ្ឍតំបន់ហ្កាហ្សាឡើងវិញ ឲ្យក្លាយទៅជាតំបន់ឆ្នេរដ៏ស្រស់ស្អាតនៅមជ្ឈិមបូព៌ា (Riviera of the Middle East) លោក Scholz បានឆ្លើយតបថា ជា«រឿងអាស្រូវមួយ។ លើសពីនេះទៅទៀត នេះគឺការលើកឡើងដ៏គួរឲ្យភ័យខ្លាច»ដែលទាក់ទងនឹងទំហំនៃការបំផ្លិចបំផ្លាញ ដែលបច្ចុប្បន្ន អាចមើលឃើញជាក់ស្តែង នៅទីនោះ។