ក្រសួងការបរទេសចិន និយាយនៅថ្ងៃចន្ទនេះថា ចិនសង្ឃឹមថា សម្តេចសង្ឃ Dalai Lama អាចវិលត្រឡប់ទៅរកវិថីត្រឹមត្រូវវិញ ហើយនិងបើកទ្វារស្វាគមន៍ចំពោះកិច្ចពិភាក្សាពីអនាគតរបស់ម្ចាស់ជ័យលាភីណូបែលសន្តិភាពអង្គនេះ ពេលដែលស្ថានភាពច្បាស់លាស់ឈានដល់ហើយនោះ ។

ពេលសុំឲ្យធ្វើសេចក្តីអត្ថាធិប្បាយចំពោះការស្លាប់របស់បងប្រុស Gyalo Thondup របស់មេដឹកនាំសាសនាអង្គនេះ លោក Guo Jiakun គឺជាអ្នកនាំពាក្យក្រសួងការបរទេសចិន និយាយនៅក្នុងសន្និសីទសារព័ត៌មានថា ចិនបើកទ្វារស្វាគមន៍ការជជែកពិភាក្សាពីអនាគតរបស់សម្តេចសង្ឃ Dalai Lama ដរាបណាព្រះអង្គបោះបង់ចោលគោលជំហររបស់ទ្រង់នៃការបំបែកមាតុភូមិ ។

កាលពីមុនលោក Gyalo Thondup ធ្លាប់ជាប្រេសិតពិសេសក្រៅផ្លូវការរបស់សម្តេចសង្ឃ Dalai Lama ក្នុងការជជែកពិភាក្សាជាមួយក្រុមមន្រ្តីចិន ។ លោក Gyalo Thondup បានស្លាប់នៅក្នុងផ្ទះរបស់លោកស្ថិតក្នុងទីក្រុង Kalimpong ប្រទេសឥណ្ឌាកាលពីថ្ងៃសៅរ៍ ក្នុងវ័យ ៩៧ឆ្នាំ ។

សម្តេចសង្ឃ Dalai Lama ដែលមានព្រះជន្ម ៩០វស្សាក្នុងឆ្នាំនេះ បានយាងជម្លៀសខ្លួនចេញពីតំបន់ទីបេតិ៍ទៅកាន់ប្រទេសឥណ្ឌា កាលពីឆ្នាំ ១៩៥៩ ក្រោយបះបោរមិនបានជោគជ័យប្រឆាំងនឹងការគ្រប់គ្រងរបស់ចិន ប៉ុន្តែព្រះអង្គបានបង្ហាញបំណងរបស់ទ្រង់ចង់វិលត្រឡប់មកកាន់តំបន់ទីបេតិ៍វិញ មុនពេលដែលព្រះអង្គសុគត ។

នៅក្នុងឆ្នាំ ២០១១ សម្តេចសង្ឃ Dalai Lama បានលាលែងពីតំណែងជាមេដឹកនាំនយោបាយរដ្ឋាភិបាលនិរទេសទីបេតិ៍ដែលចិនពុំទទួលស្គាល់ ។ កិច្ចប្រជុំផ្លូវការជាមួយក្រុមតំណាងរបស់ព្រះអង្គ បានជាប់គាំងចាប់តាំងពីពេលនោះមក ៕