គណៈកម្មការអឺរ៉ុប នៅថ្ងៃចន្ទ (ទី១០ ខែកុម្ភៈ) នេះ បានប្រាប់ឲ្យដឹងថា ខ្លួននឹងតបតវិញ ដើម្បីការពារផលប្រយោជន៍របស់សហភាពអឺរ៉ុប (EU) បន្ទាប់ពីមានការប្រកាសរបស់ប្រធានាធិបតីអាមេរិក លោក Donald Trump អំពីការដំឡើងពន្ធលើលោហធាតុ ដែលជិតកើតមានហើយ ប៉ុន្តែបានប្រាប់ថា ខ្លួននឹងមិនឆ្លើយតប រហូតដល់មានការបញ្ជាក់ អំពីវិធានការនេះ។

គួរបញ្ជាក់ថា លោក Trump កាលពីថ្ងៃអាទិត្យ (ទី៩ ខែកុម្ភៈ) បាននិយាយថា លោកនឹងដាក់ចេញនូវការដំឡើងពន្ធថ្មីចំនួន ២៥ភាគរយលើការនាំចូលដែកថែប និងអាលុយមីញ៉ូមទាំងអស់ទៅកាន់សហរដ្ឋអាមេរិក ដែលជាការកើនឡើងនូវភាពតានតឹងដ៏ធំមួយទៀតនៃការផ្លាស់ប្តូរគោលនយោបាយពាណិជ្ជកម្មរបស់លោក។

តែយ៉ាងណាក្ដី គណៈកម្មការអឺរ៉ុប បានប្រាប់ថា ខ្លួនមិនបានទទួលការជូនដំណឹងជាផ្លូវការណាមួយ ទាក់ទងនឹងការយកពន្ធបន្ថែមលើទំនិញរបស់ EU ហើយប្លុកនឹងមិនឆ្លើយតប ចំពោះ «ការប្រកាសដ៏ទូលំទូលាយ» នេះទេ ប្រសិនបើគ្មានសេចក្ដីលម្អិត ឬការបញ្ជាក់ជាលាយលក្ខណ៍អក្សរ។

គណៈកម្មាការបានឲ្យដឹងនៅក្នុងសេចក្តីថ្លែងការណ៍ថា៖ «សហភាពអឺរ៉ុបមើលមិនឃើញពីហេតុផល ដើម្បីដំឡើងពន្ធលើការនាំចេញរបស់ខ្លួនឡើយ។ យើងនឹងតបតវិញ ដើម្បីការពារផលប្រយោជន៍របស់ធុរកិច្ច កម្មករ និងអ្នកប្រើប្រាស់អឺរ៉ុបពីការមានវិធានការមិនសមហេតុផលនេះ»។

ចំណាត់ការរបស់លោក Trump ប្រសិនបើត្រូវបានបញ្ជាក់ថា ពិតមែន នឹងឆ្លុះបញ្ចាំងពីវិធានការរបស់លោក កាលពីអាណត្តិដំបូង នៅពេលដែលលោកយកពន្ធ ២៥ភាគរយ លើដែកថែបពីប្រទេសជាច្រើន និង ១០ភាគរយលើអាលុយមីញ៉ូម។ សម្រាប់សហភាពអឺរ៉ុប ការអនុវត្តនោះគ្របដណ្តប់លើការនាំចេញតម្លៃ ៦,៤ពាន់លានអឺរ៉ូ (៦,៦ពាន់លានដុល្លារ)៕