ប្រទេសកូសូវ៉ូ ហាក់កំពុងឆ្ពោះទៅរករយៈពេលនៃភាពមិនប្រាកដប្រជាផ្នែកនយោបាយកាលពីថ្ងៃចន្ទ (១០ កុម្ភៈ) ខណៈគណបក្សនយោបាយធំៗបានច្រានចោលការកសាងក្រុមចម្រុះដឹកនាំរដ្ឋាភិបាល បន្ទាប់ពីការបោះឆ្នោតដែលមើលឃើញបក្សកាន់អំណាចមិនទទួលបានសំឡេងភាគច្រើនទាំងស្រុង។

លទ្ធផលពីគណៈកម្មាធិការរៀបចំការបោះឆ្នោតបង្ហាញថា បក្សកាន់អំណាច Vetevendosje របស់លោកនាយករដ្ឋមន្រ្តី Albin Kurti បានឈ្នះ ៤១,១%សំឡេង ក្នុងសន្លឹកឆ្នោត ៩៧% ដែលបានរាប់រួច ដោយនាំឱ្យមានការអបអរនៅរដ្ឋធានីព្រីស្ទីណា បន្ទាប់ពីយុទ្ធនាការដ៏តានតឹងមួយ។

អ្វីដែលស្ថិតក្នុងហានិភ័យនោះគឺអនាគតគោលនយោបាយរបស់កូសូវ៉ូ នៅផ្នែកភាគខាងជើងដែលបែងចែកជាតិសាសន៍ ហើយនិងទំនាក់ទំនងជាមួយសម្ព័ន្ធមិត្តប្រពៃណីរបស់ខ្លួនគឺសហភាពអឺរ៉ុប និងអាមេរិក ដែលភាគីទាំងពីរនេះបានសម្តែងការប្រឆាំងទៅនឹងការគ្រប់គ្រងរបស់លោកនាយករដ្ឋមន្រ្តី Kurti។

អ្នកវិភាគនយោបាយនិយាយថា លោក Kurti នឹងត្រូវបង្កើតក្រុមចម្រុះជាមួយបក្សប្រជាធិបតេយ្យកូសូវ៉ូ (PDK) ដែលឈរនៅលំដាប់ទីពីរក្នុងសំឡេងឆ្នោត ២២,២% ឬជាមួយបក្សសម្ព័ន្ធប្រជាធិបតេយ្យកូសូវ៉ូ (LDK) ដែលនៅលំដាប់ទីបីមានសំឡេងឆ្នោត ១៧,៨% ប៉ុន្តែរឿងនោះហាក់មិនកើតឡើងទេ។

ក្នុងសុន្ទរកថាជ័យជម្នះនៅព្រឹកព្រលឹម លោក Kurti ដែលបានច្រានចោលការបង្កើតក្រុមចម្រុះមុនការបោះឆ្នោត បានហៅក្រុមប្រឆាំងថាជា "សត្វធាតុ" និង "ចោរ" ខណៈមេដឹកនាំបក្សប្រឆាំង PDK ថានឹងមិនចូលរួមជាដៃគូក្រុមចម្រុះជាមួយបក្សកាន់អំណាចទេ៕