ប្រធានាធិបតីអាមេរិក លោក Donald Trump បាននិយាយថា លោកបានជជែកមួយប្រធានាធិបតីចិន លោក Xi Jinping ចាប់តាំងពីចូលកាន់តំណែងកាលពីថ្ងៃទី ២០ ខែមករាឆ្នាំ២០២៥នេះ ប៉ុន្តែពុំបានផ្តល់ព័ត៌មានលម្អិតអំពីប្រធានបទនៃការសន្ទនារបស់មេដឹកនាំទាំងពីរនោះទេ។

លោក Trump បានធ្វើអត្ថាធិប្បាយបែបនេះនៅក្នុងបទសម្ភាសន៍មួយ ដែលត្រូវបានចាក់ផ្សាយនៅលើទូរទស្សន៍ Fox News កាលពីថ្ងៃចន្ទដើមសប្ដាហ៍នេះ។ 

នៅពេលសួរថាតើរូបលោកបាននិយាយជាមួយមេដឹកនាំចិនចាប់តាំងពីការឡើងកាន់តំណែងជាប្រធានាធិបតីសហរដ្ឋអាមេរិកមែនទេ លោក Trump បានឆ្លើយថា មែនហើយ លោកបាននិយាយជាមួយលោកXi តាមទូរស័ព្ទ ហើយលោកបាននិយាយជាមួយប្រជាជនចិនផងដែរ ។លោក Trump បានបន្ថែមថា យើងមានទំនាក់ទំនងផ្ទាល់ខ្លួនល្អណាស់ ។

យ៉ាងណាលោកប្រធានាធិបតីរូបនេះ ពុំបានផ្តល់ព័ត៌មានលម្អិតអំពីពេលវេលាពិតប្រាកដនៃការជួបសន្ទនាតាមទូរស័ព្ទ ឬថាបានកើតឡើងពីអ្វីខ្លះសម្រាប់កិច្ចពិភាក្សានោះ។

លោក Trump ធ្លាប់និយាយកាលពីសប្តាហ៍មុនថា លោកមិនប្រញាប់និយាយជាមួយលោក Xi ដើម្បីព្យាយាមបញ្ចៀសសង្គ្រាមពាណិជ្ជកម្មថ្មីរវាងប្រទេសដែលមានសេដ្ឋកិច្ចធំជាងគេបំផុតទាំងពីរនោះទេ។ការសន្ទនារវាងលោកXiនិងលោកTrump ត្រូវបានគេមើលឃើញថាមានសារៈសំខាន់ចំពោះការបន្ធូរបន្ថយ ឬពន្យារពេលការដំឡើងពន្ធ ក្រោយប្រទេសទាំង២ពីរដំឡើងពន្ធសងសឹកគ្នារួចហើយ។

សេតវិមាន និងក្រសួងការបរទេសចិនមិនបានឆ្លើយតបភ្លាមៗចំពោះសំណើសុំការអត្ថាធិប្បាយលើបទសម្ភាសន៍របស់លោក Trump ទៅកាន់ទូរទស្សន៍ Fox News នោះទេ។

គួររម្លឹកថា លោក Trump និងលោក Xi ធ្លាប់បានជជែកគ្នាម្ដងរួចហើយមុនលោក Trump ចូលកាន់តំណែងក្នុងខែមករា ហើយបានពិភាក្សាគ្នាអំពីបញ្ហាជាច្រើនរួមមាន TikTok ពាណិជ្ជកម្ម និងកោះតៃវ៉ាន់៕