អង្គការមិនរកប្រាក់កម្រៃនៅប្រទេសអាហ្រ្វិកខាងត្បូង បានសម្តែងការព្រួយបារម្ភ កាលពីថ្ងៃចន្ទ ទី១០ ខែកុម្ភៈ អំពីផលប៉ះពាល់លើការទទួលបានសេវាសុខភាពរបស់សហគមន៍ដែលខ្វះខាត បន្ទាប់ពីការសម្រេចចិត្តរបស់ប្រធានាធិបតីសហរដ្ឋអាមេរិកលោក Donald Trump ក្នុងការកាត់ជំនួយហិរញ្ញវត្ថុដល់ប្រទេសនេះ។

ការកាត់ជំនួយ ជាការឆ្លើយតបទៅនឹងចំណាត់ការដកហូតដីធ្លីរបស់ប្រទេសអាហ្រ្វិកខាងត្បូង ដែលបានបង្ខំឱ្យបិទទីតាំងមួយចំនួនដូចជា គ្លីនិកសុខភាព Engage Men នៅទីក្រុង Johannesburg ដែលកាលពីពេលមុន បានទទួលមូលនិធិពីសហរដ្ឋអាមេរិក។

លោកស្រី Siya Hlongwa ជាស្ត្រីកែភេទ និងជានាយកអង្គការ Trans Works Global ជាអង្គការមិនរកប្រាក់ចំណេញសម្រាប់ក្រុមដែលខ្វះខាត បានប្រាប់សារព័ត៌មានរ៉យទ័រថា «វាជាអ្វី ដែលនាំមកនូវការថប់បារម្ភសម្រាប់មនុស្សជាច្រើន»។ លោកស្រី Hlongwa បានសម្តែងការព្រួយបារម្ភអំពីការថប់បារម្ភដែលបុគ្គលជាច្រើនអាចប្រឈមមុខ នៅពេលស្វែងរកការថែទាំសុខភាពសក្នុងបរិយាកាសថ្មី ដោយសារតែការបិទគ្លីនិកសុខភាព។

មន្ត្រីសេតវិមាន បាននិយាយថា លោក Trump បានចុះហត្ថលេខាលើក្រឹត្យមួយ មានគោលបំណងលើប្រទេសអាហ្វ្រិកខាងត្បូង ដើម្បីឲ្យដោះស្រាយបញ្ហាសិទ្ធិមនុស្សនៅក្នុងប្រទេសនេះ។

ប្រធានាធិបតីអាហ្វ្រិកខាងត្បូង លោក Cyril Ramaphosa បានការពារគោលនយោបាយដីធ្លីរបស់ប្រទេស បន្ទាប់ពីការគំរាមកំហែងរបស់លោក Trump ដោយបញ្ជាក់ថា គ្មានដីណាមួយត្រូវបានរឹបអូសឡើយ ហើយគោលនយោបាយនេះមានគោលបំណងធានាឱ្យមានសិទ្ធិទទួលបានដីធ្លីជាសាធារណៈដោយសមធម៌។