ការបង្រៀននៅតាមសាលារដ្ឋនាពេលបច្ចុប្បន្ន បានចាប់ផ្ដើមកែប្រែ ពីការបង្រៀនលើក្ដារខៀន និង​សៀវភៅទាំងស្រុង ទៅជាការប្រើប្រាស់បច្ចេកវិទ្យាឌីជីថបន្ថែម សម្រាប់ជួ​យ​ដល់​ការ​បង្រៀន​ជា​ប្រចាំ​ថ្ងៃ។ ការទាញយកបច្ចេកវិទ្យាជួយដល់ការបង្រៀននិងរៀននេះ អាចមាន​ភាព​ផ្សេង​គ្នា​ទៅ​តាម​សាលានីមួយៗ និងតាមកម្រិតថ្នាក់ផងដែរ។

សាលារៀន​រដ្ឋនាពេលបច្ចុប្បន្ននេះ មិនថានៅកម្រិតបឋមសិក្សា ឬវិទ្យាល័យនោះទេ គឺកំពុង​ប្រើ​ប្រា​ស់​បច្ចេកវិទ្យាឌីជីថល ជួយដល់ការបង្រៀនប្រចាំថ្ងៃរបស់ខ្លួន។ ជាក់​ស្ដែង​សម្រាប់​បឋម​សិក្សា​អ្នក​ឧកញាមហាភក្ដី ហ៊ុននាងព្រែកកំពឹស បានចាប់ផ្ដើម​ថ្នាក់កំព្យូទ័រ​សម្រាប់​សិស្ស​ក្នុង​ឆ្នាំ​សិក្សា​ថ្មី​នេះ ដែលជាការបន្ថែមលើអ្វីដែលសាលាអនុវត្តកន្លងមក។ នេះជាការលើកឡើងរបស់ លោកគ្រូ ផុន ណាត ជានាយកសាលា។

លោកលើកឡើងថា វាជាភាពចាំបាច់ ដែលត្រូវប្រើប្រាស់បច្ចេកវិទ្យាឌីជីថលបន្ថែម សម្រាប់ជួយដល់ការបង្រៀននាពេលបច្ចុប្បន្ន។ លោកថាវាជាការដើរស្របទៅតាមសង្គមបច្ចុប្បន្ន ហើយវាជាភាពចាំបាច់ ដែលគ្រូបង្រៀនត្រូវខិតខំ។

សម្រាប់ការបង្រៀននេះដែរ លោកគ្រូ ឈាង រស្មី ជាគ្រូបង្រៀនថ្នាក់ទី ៦ នៅសាលាបឋមសិក្សា អ្នកឧកញាមហាភក្ដី ហ៊ុននាងព្រែកកំពឹស លើកឡើងដែរថា ការអប់រំនាពេលបច្ចុប្បន្នគឺមានការប្រែច្រើន។ លោកថាជាក់ស្ដែងនាពេលនេះ សាលាមានថ្នាក់កំព្យូទ័រដែលមានការដឹកនាំសិស្សអនុវត្តផ្ទាល់។ សម្រាប់រូបលោក ក៏ដូចជាលោកគ្រូ អ្នកគ្រូដទៃ ក៏មានការភ្ជាប់តេលេក្រាមជាមួយអាណាព្យាបាលសិស្ស ដាមដានសកម្មភាព និងដាក់កិច្ចការផ្ទះនានាសម្រាប់សិស្សផងដែរ។

ក្នុងនាមជាគ្រូបង្រៀនដែលកំពុងប្រើប្រាស់បច្ចេកវិទ្យាជួយដល់ការបង្រៀនប្រចាំថ្ងៃនេះ លោកគ្រូ ឈាង រស្មី ក៏បានកត់សម្គាល់ឃើញពីភាពរីកចម្រើនរបស់សិស្សផងដែរ។

ផ្សាភ្ជាប់នឹងការប្រើប្រាស់បច្ចេកក្នុងវិស័យអប់រំនេះ ក្រសួងអប់រំ យុវជន និងកីឡា នៅថ្ងៃទី ១៧ និងថ្ងៃទី ១៨ ខែកុម្ភៈ ឆ្នាំ ២០២៥ខាងមុខ នឹងមានការរៀបចំសន្និសីទ និងពិព័រណ៦បច្ចេកវិទ្យាអប់រំកម្ពុជាលលើកទី ១ ក្រោមប្រធានបទ «មាគ៌ាកម្ពុជាឆ្ពោះទៅកាន់ការអប់រំឌីជីថល»៕ អត្ថបទ៖គឹមហុក