រុស្ស៊ី បានព្រមានកាលពីថ្ងៃចន្ទ (១០ កុម្ភៈ) ថា ចក្ខុវិស័យសម្រាប់ការពង្រីកសសរស្តម្ភចុងក្រោយនៃកិច្ចព្រមព្រៀងគ្រប់គ្រងអាវុធនុយក្លេអ៊ែរដែលនៅសេសសល់រវាងទីក្រុងមូស្គូ និងទីក្រុងវ៉ាស៊ីនតោន ដែលជាមហាអំណាចនុយក្លេអ៊ែរធំបំផុតទាំងពីររបស់ពិភពលោក មើលទៅដូចជាមិនមានការរំពឹងទុកល្អទេ ហើយថាស្ថានភាពហាក់ដូចជាជាប់គាំង។

សន្ធិសញ្ញាកាត់បន្ថយអាវុធយុទ្ធសាស្ត្រថ្មី ឬហៅថាកិច្ចព្រមព្រៀង New Start - ដែលកំណត់ចំនួនក្បាលគ្រាប់នុយក្លេអ៊ែរយុទ្ធសាស្ត្រដែលសហរដ្ឋអាមេរិក និងរុស្ស៊ីអាចដាក់ពង្រាយបាន និងការដាក់ពង្រាយមីស៊ីលមានមូលដ្ឋាននៅលើដី និងនាវាមុជទឹក រួមទាំងយន្តហោះទម្លាក់គ្រាប់បែកដើម្បីបញ្ជូនគ្រឿងយុទ្ធោបករណ៍ទាំងនោះ - គឺនឹងត្រូវអស់សុពលភាពក្នុងរយៈពេលតិចជាងមួយឆ្នាំ ពោលគឺនៅថ្ងៃទី០៥ ខែកុម្ភៈ ឆ្នាំ២០២៦។

ប្រធានាធិបតីអាមេរិក លោក Donald Trump ក្នុងអំឡុងពេលអាណត្តិដំបូងរបស់ខ្លួន បានដកសហរដ្ឋអាមេរិក ចេញពីសន្ធិសញ្ញាសំខាន់មួយទៀត គឺសន្ធិសញ្ញាកងកម្លាំងនុយក្លេអ៊ែរកម្រិតមធ្យម (INF) ហើយឥឡូវនេះ កិច្ចព្រមព្រៀង New Start គឺជាកិច្ចព្រមព្រៀងនុយក្លេអ៊ែរតែមួយគត់ដែលនៅសល់។

អនុរដ្ឋមន្ត្រីការបរទេស លោក Sergei Ryabkov ដែលមើលការខុសត្រូវលើទំនាក់ទំនង និងការគ្រប់គ្រងអាវុធរបស់សហរដ្ឋអាមេរិក បានប្រាប់សន្និសីទសារព័ត៌មាននៅទីក្រុងមូស្គូ កាលពីថ្ងៃចន្ទសប្ដាហ៍នេះថា ចក្ខុវិស័យសម្រាប់កិច្ចពិភាក្សាស្តីពីការកែប្រែ និងបន្តកិច្ចព្រមព្រៀងនេះ មើលទៅហាក់ដូចជាអាក្រក់ណាស់សម្រាប់ពេលនេះ៕