មន្ត្រីជាន់ខ្ពស់មួយរូប បាននិយាយកាលពីថ្ងៃចន្ទថា កងកម្លាំងសន្តិសុខព្រំដែនស៊ីរី បានប៉ះទង្គិចគ្នាយ៉ាងខ្លាំងក្លា ជាមួយ «ក្រុមក្រុមរត់ពន្ធប្រដាប់អាវុធ» នៅក្នុងភូមិមួយចំនួន នៅក្បែរព្រំដែនលីបង់។

លោក Moayad Al-Salama មេបញ្ជាការតំបន់ភាគខាងលិច ក្នុងរដ្ឋបាលសន្តិសុខព្រំដែន បានប្រាប់ទីភ្នាក់ងារសារព័ត៌មានរដ្ឋ SANA ថា ការប្រឈមមុខដាក់គ្នា បានកើតឡើងកាលពីសប្តាហ៍មុន ដែលជាផ្នែកនៃប្រតិបត្តិការដ៏ទូលំទូលាយមួយ ដើម្បីការពារព្រំដែនភាគខាងលិចរបស់ប្រទេសស៊ីរី។

លោក Al-Salama បានសង្ស័យថា ក្រុមរត់ពន្ធភាគច្រើននៅតាមព្រំដែន មានទំនាក់ទំនងជាមួយក្រុម ហេសបូឡា ដែលលោកបានចោទប្រកាន់ថា បានការពារអ្នកជួញដូរ។ ក្នុងអំឡុងពេលប្រតិបត្តិការ កងកម្លាំងស៊ីរី បានរកឃើញទីតាំងផលិតគ្រឿងញៀន ឃ្លាំងអាវុធ និងកន្លែងបោះពុម្ពរូបិយប័ណ្ណក្លែងក្លាយ។

ទោះបីជាមានការប៉ះទង្គិចគ្នាជាបន្តបន្ទាប់ក៏ដោយ កងកម្លាំងស៊ីរី បានបដិសេធមិនធ្វើការវាយប្រហារលើទឹកដីលីបង់ ទោះបីជាលោក Al-Salama បានអះអាងថា ក្រុមហេសបូឡា បានបាញ់ផ្លោងទៅលើទីតាំងស៊ីរី ដែលជំរុញឲ្យមានការសងសឹកប្រឆាំងនឹងក្រុមអ្នកជួញដូរ និងអ្នកដែលនៅសេសសល់ពីអតីតរបប នៅក្នុងប្រទេសស៊ីរីក៏ដោយ។

កងទ័ពលីបង់បាននិយាយកាលពីថ្ងៃសៅរ៍ថា ខ្លួនបានបញ្ជាឲ្យដាក់ពង្រាយកងទ័ព នៅតាមព្រំដែនស៊ីរី ដើម្បីសងសឹកប្រឆាំងនឹងការបាញ់ប្រហារ ដែលមានប្រភពចេញពីទឹកដីស៊ីរី។