ភ្នំពេញ ៖ ស្រ្តីនៅកម្ពុជា មានចំនួន ៧៩ ភាគរយ នៅក្នុងសកម្មភាពសេដ្ឋកិច្ច ដែលមានអត្រាកំណើនខ្ពស់ជាគេនៅក្នុងតំបន់ ក្នុងនោះស្រ្តី ចំនួន ៦៩ ភាគរយ ជាតំណាងអង្គភាពសេដ្ឋកិច្ច និងមាន ៦១ ភាគរយ ជាអ្នកដឹកនាំ និងជាម្ចាស់ក្រុមហ៊ុន និងសហគ្រាសផ្សេងៗនៅ កម្ពុជា បច្ចុប្បន្នស្រ្តីកំពុងមានតួនាទីសំខាន់នៅក្នុងសេដ្ឋកិច្ច។ 

​លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី លើកឡើងនៅក្នុងពិធីបើកសន្និបាតបូកសរុបសមិទ្ធផល ការងារឆ្នាំ ២០២៤ និងលើកទិសដៅបន្តរបស់ក្រសួងកិច្ចការនារី នៅថ្ងៃទី ១១ ខែ មករា ឆ្នាំ ២០២៤ នេះថា ជុំវិញការងារស្រ្តីនៅក្នុង សេដ្ឋកិច្ច ជាពិសេសបញ្ហាសេដ្ឋកិច្ចក្រៅប្រព័ន្ធ កន្លងមកក្រសួងកិច្ចការនារីបានអនុវត្តរួចហើយ បានជួយគាំទ្រស្រ្តីដែលធ្វើការងារសេដ្ឋ កិច្ចក្រៅប្រព័ន្ធនៅតាមបណ្តាខេត្ត ក៏ដូចជានៅរាជធានីភ្នំពេញផងដែរ បច្ចុប្បន្នក្រសួងមានគម្រោងថ្មីមួយគឺ មជ្ឈមណ្ឌលអភិវឌ្ឍន៍ សហគ្រិនភាពស្រ្តី ដោយបានធ្វើការជាមួយក្រសួងពាក់ព័ន្ធ និងការជួយស្រ្តីដែលជាម្ចាស់សហគ្រាសលក្ខណៈគ្រួសារ និងសហគ្រាស ខ្នាតតូច កន្លងមកក្រសួងបានបណ្តុះបណ្តាលជាច្រើនវគ្គផងដែរ ។ បញ្ហានេះ ក្រសួងកិច្ចការនារីកំពុងគិតថា ធ្វើយ៉ាងណាជំរុញឱ្យពួក គាត់ទៅចុះបញ្ជីតាមថ្នាលឌីជីថលរបស់រាជរដ្ឋាភិបាល ដើម្បីទទួលបានសេវាដ៏ទៃទៀតពីក្រសួងពាក់ព័ន្ធនានា។ 

លោកជំទាវកិត្តិបណ្ឌិត បន្តថា ចំណែកស្រ្តីនិងការអភិវឌ្ឍន៍សេដ្ឋកិច្ច, បច្ចុប្បន្នស្រ្តីរបស់កម្ពុជាបានកំពុងចូលរួមយ៉ាងសកម្ម នៅក្នុងវិស័យសេដ្ឋកិច្ច ជាក់ស្តែងមកដល់ពេលនេះ ស្រ្តីដែលចូលរួមក្នុងសេដ្ឋកិច្ចនៅកម្ពុជា គឺមានអត្រាខ្ពស់ជាងគេនៅក្នុងតំបន់ ក្នុងចំនួនប្រមាណ ៧៩ ភាគរយ នៃការចូលរួមក្នុងសកម្មភាពសេដ្ឋកិច្ច ក្នុងនោះបើធៀបនិងអាស៊ាន កម្ពុជាមានអត្រាខ្ពស់ជាងគេ ដែលនេះជាការបង្ហាញឱ្យឃើញថា ស្រ្តីនៅកម្ពុជាកំពុងមានភាពសកម្មនៅក្នុងការចូលរួមអភិវឌ្ឍន៍សេដ្ឋកិច្ច និងសង្គម។

ទាក់ទិនសេដ្ឋកិច្ចក្រៅប្រព័ន្ធ, លោកជំទាវកិត្តិបណ្ឌិត អ៊ឹង កន្ថាផាវី បន្តលើកឡើងថា ផ្អែកតាមផែនការយុទ្ធសាស្រ្តជាតិ ស្តីពី ការអភិវឌ្ឍន៍សេដ្ឋកិច្ចក្រៅប្រព័ន្ធ ២០២៣-២០២៨, សម្រាប់នៅកម្ពុជាមានចំនួនប្រមាណជិត ៨ លាននាក់ នៃប្រជាជនដែលមាន ការងារធ្វើ ក្នុងនោះប្រជាជនមានការងារធ្វើនៅក្នុងប្រព័ន្ធ មានចំនួនប្រមាណជិត ១.១ លាននាក់ ខណៈអ្នកដែលធ្វើការងារនៅក្នុង វិស័យក្រៅប្រព័ន្ធ មានចំនួនជាង ៦ លាននាក់។ លោកជំទាវកិត្តិបណ្ឌិត បន្តថា ជុំវិញបញ្ហានេះហើយដែលរាជរដ្ឋាភិបាលចាប់អារម្មណ៍ ព្រោះវាពាក់ព័ន្ធនិងរាជរដ្ឋាភិបាលលើបញ្ហាពន្ធដារ និងការគិតគូរទៅដល់កិច្ចការពារសិទ្ធ និងកិច្ចការពារផលប្រយោជន៍របស់ពួកគាត់ ផងដែរ៕

អត្ថបទ៖ សុន រ៉ាឌី