មន្ត្រីជាន់ខ្ពស់ប្រឆាំងភេរវកម្មរបស់អង្គការសហប្រជាជាតិ បាននិយាយកាលពីថ្ងៃចន្ទថា ក្រុមភេរវកររដ្ឋឥស្លាម(IS) នៅតែគំរាមកំហែងសន្តិសុខពិភពលោកយ៉ាងធ្ងន់ធ្ងរ ហើយកិច្ចសហប្រតិបត្តិការពហុភាគីមានសារៈសំខាន់ណាស់ ក្នុងការប្រយុទ្ធប្រឆាំងនឹងអំពើភេរវកម្មប្រកបដោយប្រសិទ្ធភាព។

លោក Vladimir Voronkov អគ្គលេខាធិការរងនៃការិយាល័យប្រឆាំងភេរវកម្ម បានលើកឡើង ក្នុងអំឡុងសន្និសីទមួយរបស់លោក ទៅកាន់ក្រុមប្រឹក្សាសន្តិសុខUNថា` អំពើភេរវកម្ម នៅតែជាការគំរាមកំហែងយ៉ាងខ្លាំង និងកំពុងវិវឌ្ឍន៍ចំពោះសន្តិភាព និងសន្តិសុខសកល ដែលគ្មានរដ្ឋណាមួយ អាចប្រឈមមុខនឹងវា តែម្នាក់ឯងបានទេ។

លោក Voronkov បានគូសបញ្ជាក់ថា កិច្ចសហប្រតិបត្តិការពហុភាគីប្រកបដោយនិរន្តរភាព នៅតែជាកត្តាសំខាន់ ក្នុងការប្រយុទ្ធប្រឆាំងអំពើភេរវកម្មប្រកបដោយប្រសិទ្ធភាព។

ស្ថានការណ៍ដ៏តានតឹងក្នុងប្រទេសស៊ីរី «គឺឲ្យព្រួយបារម្ភណាស់ ដោយសារតែការហានិភ័យថា ឃ្លាំងស្តុកអាវុធទំនើប អាចធ្លាក់ទៅក្នុងដៃភេរវករ» ដោយលោកបានបន្ថែមថា ហានិភ័យ គឺមានកម្រិតខ្ពស់ណាស់ នៅក្នុងតំបន់ Badia ដែលបម្រើជាមជ្ឈមណ្ឌលសម្រាប់ផែនការប្រតិបត្តិការខាងក្រៅរបស់ក្រុម IS។

លោក Voronkov បាននិយាយថា នៅក្នុងប្រទេសអាហ្វហ្គានីស្ថាន ក្រុម ISIL-K ដែលជាសាខាដ៏គ្រោះថ្នាក់បំផុតមួយរបស់ក្រុមរដ្ឋឥស្លាម បានបន្តគំរាមកំហែងយ៉ាងធ្ងន់ធ្ងរ។ «បន្ថែមពីលើការវាយប្រហារនៅអាហ្វហ្គានីស្ថាន អ្នកគាំទ្រ ISIL-K បានរៀបចំផែនការវាយប្រហារនៅអឺរ៉ុប ហើយកំពុងស្វែងរកយ៉ាងសកម្មក្នុងការជ្រើសរើសបុគ្គលមក ពីបណ្តារដ្ឋអាស៊ីកណ្តាល»។