ប្រជាជនប៉ាឡេស្ទីនរាប់សិបគ្រួសារ កាលពីថ្ងៃចន្ទ បានភៀសខ្លួនពីជំរំជនភៀសខ្លួន Nur Shams នៅភាគខាងជើងនៃតំបន់វេសបែង (West Bank) ខណៈដែលអ៊ីស្រាអែល បានបន្តប្រតិបត្តិការយោធាដ៏ខ្លាំងក្លា     មួយ។

លោក Ahmed Ezza ដែលជាអ្នកស្រុកម្នាក់ បាននិយាយថា ៖«យើងឮសំឡេងផ្ទុះ និងការទម្លាក់គ្រាប់បែក ព្រមទាំងគ្រឿងចក្រឈូសឆាយ។ នេះ គឺជាសោកនាដកម្មមួយ។ ពួកគេកំពុងធ្វើនៅទីនេះនូវអ្វីដែលពួកគេ បានធ្វើនៅតំបន់ហ្កាហ្សា។ 

លោក Ahmed Abu Zahra អ្នកស្រុកម្នាក់ទៀតនៃជំរំដែលនៅជាយក្រុង Tulkarem បាននិយាយថា លោកត្រូវបានគេបង្ខំឲ្យចាកចេញពីផ្ទះរបស់ខ្លួន។

«កងទ័ព (អ៊ីស្រាអែល) បានចូលមក ហើយយើងត្រូវបានគេបង្ខំឲ្យចាកចេញ បន្ទាប់ពីពួកគេ បានចាប់  ផ្តើមបំផ្លាញផ្ទះសម្បែងរបស់យើង»។ 

ក្រសួងសុខាភិបាលក្នុងទឹកដីនេះ បានបញ្ជាក់ថា ជនជាតិប៉ាឡេស្ទីនបីនាក់ ក្នុងនោះមានស្ត្រីពីរនាក់ និងយុវជនម្នាក់ ត្រូវបានសម្លាប់ នៅក្រុង Nur Shams កាលពីថ្ងៃអាទិត្យ។

អ៊ីស្រាអែល បាននិយាយថា កងអាវុធហត្ថរបស់ខ្លួន បានបើកការស៊ើបអង្កេតលើការស្លាប់របស់ស្ត្រីម្នាក់ ក្នុងចំណោមពួកគេ ដែលជាស្ត្រីមានផ្ទៃពោះ ៨ខែ។