មន្ត្រីកងទ័ពជើងទឹករុស្ស៊ី បាននិយាយក្នុងវេទិកាសន្ទនាអន្តរជាតិ AMAN នៅទីក្រុង Karachi ប្រទេសប៉ាគីស្ថានថា ប្រទេសរុស្ស៊ី បានស្នើបង្កើតក្រុមការងារមួយ ដើម្បីតាមដានការគំរាមកំហែងផ្នែកសន្តិសុខដែនសមុទ្រ នាពេលបច្ចុប្បន្ន និងអនាគត និងរៀបចំសេចក្តីព្រាងអនុសាសន៍ជាក់ស្តែងស្តីពីវិធីកាត់បន្ថយពួកវា។  

លោកឧត្តមនាវីឯក Alexey Sysuyev មេបញ្ជាការនៃកងនាវាចរកងនាវាចរណ៍ប៉ាស៊ីហ្វិក នៅមូលដ្ឋាន Primorye Flotilla របស់កងកម្លាំងប្រដាប់អាវុធទាំងអស់ បាននិយាយថា៖«ដើម្បីបង្កើតប្រព័ន្ធសន្តិសុខដែនសមុទ្រអន្តរជាតិ យើងចាត់ទុកថា វាជាការចាំបាច់ណាស់ ដើម្បីបង្កើតក្រុមការងារដ៏ទូលំទូលាយមួយ ដើម្បីតាមដានការគំរាមកំហែងនាពេលបច្ចុប្បន្ន និងអនាគត ហើយបង្កើតអនុសាសន៍ជាក់ស្តែងអំពីរបៀបកម្ចាត់រាល់ការគំរាមកំហែង»។

លោក បានបន្តថា៖«យើងជឿជាក់ថា គោលដៅទី ១ របស់ក្រុមការងារនេះ គួរតែបង្កើតប្រព័ន្ធចែករំលែកព័ត៌មានរួមគ្នា។ ក្នុងដំណាក់កាលបន្ទាប់ ក្រុមការងារអចិន្ត្រៃយ៍ នឹងត្រូវបានបង្កើតឡើង ដើម្បីប្រមូលទិន្នន័យ និងធ្វើការសម្រេចចិត្តថាតើចាំបាច់ត្រូវរៀបចំការល្បាតអន្តរជាតិ នៅក្នុងទឹក ដែលមានភាពច្របូកច្របល់បំផុតនៃមហាសមុទ្រពិភពលោកឬយ៉ាងណា»។ «ក្នុងដំណាក់កាលចុងក្រោយ ក្រុមការងារនឹងត្រូវបានប្រគល់ឲ្យនូវអំណាច ក្នុងការអនុញ្ញាតឲ្យប្រើប្រាស់កងកម្លាំងអន្តរជាតិ នៅក្នុងតំបន់ដែលមានវិបត្តិ ស្របតាមឯកសារ និងបទដ្ឋានអន្តរជាតិទាំងអស់»។

វេទិកាសន្ទនា AMAN បានប្រព្រឹត្តទៅ នៅប្រទេសប៉ាគីស្ថាន នៅថ្ងៃទី ០៩ និង ១០ ខែកុម្ភៈ។ វេទិកានេះ ប្រមូលផ្តុំមេបញ្ជាការកងទ័ពជើងទឹក ឆ្មាំឆ្នេរសមុទ្រ និងមន្ត្រីជាន់ខ្ពស់ផ្សេងទៀត ព្រមទាំងអ្នកជំនាញមកពីជុំវិញពិភពលោក ដើម្បីពិភាក្សាអំពីបញ្ហាសន្តិសុខដែនសមុទ្រក្នុងតំបន់ និងបង្កើតយុទ្ធសាស្រ្តរួមសម្រាប់ការទប់ទល់នឹងការគំរាមកំហែងផ្នែកសន្តិសុខដែនសមុទ្រ ដែលកំពុងកើតមាន។