ប្រធានាធិបតីអ៊ុយក្រែនលោក Volodymyr Zelenskiy និយាយថា សមាជិកក្រុមជំនួយរបស់ប្រធានាធិបតីសហរដ្ឋអាមេរិកលោក Donald Trump នឹងបំពេញដំណើរទស្សនកិច្ចមកកាន់ប្រទេសរបស់លោកក្នុងសប្តាហ៍នេះ ដែលជាដំណើរទស្សនកិច្ចលើកដំបូងនៅចំណុចប្រសព្វការទូតដ៏សំខាន់ក្នុងសង្រ្គាមជាមួយរុស្ស៊ី ។ 

លោក Zelenskiy ដែលព្យាយាមបង្កើតទំនាក់ទំនងជិតស្និតជាមួយលោក Trump ស្របពេលដែលប្រធានាធិបតីអាមេរិករូបនេះ ចង់បញ្ចប់សង្រ្គាមឲ្យបានឆាប់រហ័សនោះ និយាយថា ដំណើរទស្សនកិច្ចនេះ នឹងកើតឡើងមុនកិច្ចប្រជុំសន្តិសុខក្រុង Munich ប្រទេសអាល្លឺម៉ង់ នាថ្ងៃទី ១៤ ដល់ ១៦ខែកុម្ភៈ បើទោះបីជារូបលោកពុំបានបញ្ជាក់ផ្ទៀងផ្ទាត់ថាតើមន្រ្តីរូបណាខ្លះនឹងត្រូវធ្វើំណើរមកដល់ក៏ដោយ ។

លោក Zelenskiy បានបញ្ជាក់ផងដែរថា លោកមានគម្រោងជួបជាមួយអនុប្រធានាធិបតីសហរដ្ឋអាមេរិកលោក JD Vance នៅកិច្ចប្រជុំក្រុង Munich ហើយក្រុមការងាររបស់លោក កំពុងព្យាយាមបង្កើតជំនួបជាមួយលោក Trump ។

សូមបញ្ជាក់ថា សហរដ្ឋអាមេរិក គឺជាសម្ព័ន្ធមិត្តដ៏សំខាន់បំផុតមួយរបស់អ៊ុយក្រែន ចាប់តាំងពីរុស្ស៊ីបើកការវាយលុកប្រទេសរបស់ពួកគេកាលពីខែកុម្ភៈ ឆ្នាំ ២០២២ ហើយទីក្រុងគីវ បានព្យាយាមឈ្នះ រដ្ឋបាលថ្មីរបស់លោក Trump ជាមួយនឹងការផ្តល់ជូនភាពជាដៃគូអភិវឌ្ឍប្រាក់បញ្ញើរ៉ែសំខាន់ៗ ។

ទាហានរុស្ស៊ី បានឈរជើងយ៉ាងរឹងមាំនៅតំបន់ភាគខាងកើតអ៊ុយក្រែន អស់រយៈពេលជាច្រើនខែមកហើយជាមួយនឹងបោះធនធានយ៉ាងធំសម្បើបនៅក្នុងការវាយលុករបស់ពួកគេ ខណៈកងទ័ពមានចំនួនតិចជាងរបស់ទីក្រុងគីវ ព្យាយាមទប់ទល់ជាមួយនឹងកង្វះខាតទាហាន និងព្រួយបារម្ភពីការផ្គត់ផ្គង់អាវុធនាពេលអនាគតពីបរទេស ។

លោក Trumpបាននិយាយកាលពីថ្ងៃអាទិត្យថា លោកបានទាក់ទងជាមួយលោក Putin ប៉ុន្តែលោកពុំបានបញ្ជាក់ពីពេលវេលានោះទេ ខណៈវិមានក្រឹមឡាំង ពុំបានបញ្ជាក់ ឬច្រានចោលការទាក់ទងទាំងនោះ ៕