លោកយាយ Victoria Roussou គឺជាពលរដ្ឋមួយរូបរស់នៅលើកោះ Santorini មានការតក់ស្លុតជាខ្លាំងចំពោះការរញ្ជួយដីតូចៗរាប់រយលើក បន្តអង្រួនកោះរបស់ក្រិកមួយនេះ ។

លោកយាយបានរស់រានពីការរញ្ជួយស្លាប់មនុស្សឆ្នាំ ១៩៥៦ ដែលបានបំផ្លិចបំផ្លាញកោះ Santorini ហើយអ្នកស្រី បានចងចាំមិនភ្លេចពីគ្រោះមហន្តរាយធម្មជាតិមួយនេះ ។

លោកយាយនិយាយថា នៅថ្ងៃកើតមានការរញ្ជួយដី វាគឺជាអ្វីមួយគួរភ័យរន្ធត់ខ្លាំងណាស់ ។ ផ្ទះបានបាក់រលំតំាងពីដំបូលរហូទដល់ក្រោម ដោយសារវាមានរាងជាសាជី ។ នៅពេលនោះម្តាយរបស់ខ្ញុំ បានពរ.ប្អូនប្រុសរបស់ខ្ញុំ និងកាន់ដៃខ្ញុំ ពួកយើងចាប់ផ្តើមរត់ដោយជើងទទេរនៅក្នុងទីក្រុងរបស់ពួកយើង ។ ពួកយើងបានរត់ចុះសំដៅទៅកាន់កំពង់ផែ ។ លោកយាយនៅចាំបានពីការសម្រាកលើដីនៅកំពង់ផែអស់រយៈពេលជាច្រើនយប់ ។

ចំណែកឯលោកតា Yiannis Renieris ដែលជាអ្នករស់រានម្នាក់ទៀតពីការរញ្ជួយដីឆ្នាំ ១៩៥៦ បានរំឭកផងដែរពីភាពតក់ស្លុតនៅលើកោះមួយនេះ ។

លោកតាបាននិយាយប្រាប់ទីភ្នាក់ងារព័ត៌មានរ៉យទ័រថា លោកតាមានការព្រួយបារម្ភខ្លាចក្រែងវាកើតឡើងម្តងទៀត ។ លោកតានិយាយថា អ្វីៗបានកន្លងហួសអស់ទៅហើយ បច្ចុប្បន្នបញ្ហានៅត្រង់ថាតើការរញ្ជួយបែបនេះ នឹងអូសបន្លាយពេលដល់ណាទៀត ។ តើវានឹងមានរយៈពេលយូរប៉ុន្មាន ហើយតើនឹងមានរឿងអ្វីកើតឡើងទៀត? ទាំងនេះ គឺជាញ្ហារបស់ពួកយើងនៅពេលឥឡូវនេះ ។

កោះ Santorini បានស្ថិតក្នុងគ្រាអាសន្នកាលពីសប្តាហ៍មុន ពេលដែលរលករញ្ជួយបានអង្រួនកោះមួយនេះ ៕