កាលពីថ្ងៃចន្ទម្សិលមិញ ក្រុមស្ម័គ្រចិត្តនៃគណៈកម្មាធិការកាកបាទក្រហមអន្តរជាតិ(ICRC) បំពាក់ដោយឧបករណ៍ការពារ បានយកសាកសពស្អុយរលួយចេញពីពន្ធនាគារ Muzenze ស្ថិតក្នុងទីក្រុង Goma ប្រទេសកេនយ៉ា រយៈពេល ២សប្តាហ៍ ក្រោយការប៉ះទង្គិចគ្នារវាងក្រុមឧទ្ទាម M23 និងកងទ័ពកុងហ្គោ ដែលនាំឲ្យមានការរត់គេចអ្នកទោសទ្រង់ទ្រាយធំ ។

 ក្រុមស្ម័គ្រចិត្តទាំងនេះ បានបាញ់ថ្នាំរម្ងាត់មេរោគ និងបោសសម្អាតសាកសពចេញពីអគាររងការខូចខាត ដើម្បីការពារហានិភ័យសុខភាព បន្ទាប់ពីអំពើហិង្សាផ្ទុះឡើង ពេលដែលកងកម្លាំងចលនា M23គ្រប់គ្រងទីក្រុងមួយនេះ កាលពីថ្ងៃទី ២៧ ខែមករាកន្លងទៅ ។

 ប្រភពព័ត៌មានពីអង្គការសហប្រជាជាតិ(UN) បានឲ្យដឹងថា ជម្លោះមួយនេះ បានឆក់យកអាយុជីវិតមនុស្សយ៉ាងហោច ២.៩០០នាក់ នៅក្នុងទីក្រុង Goma គឺជាទីក្រុងមួយមានពលរដ្ឋរស់នៅ ១លាននាក់ និងធ្វើឲ្យវិបត្តិមនុស្សធម៌កាន់តែអាក្រក់ខ្លាំងនៅក្នុងតំបន់ ។

 លោក Pacifique Mughulwa គឺជាពលរដ្ឋមួយរូបរស់នៅជិតពន្ធនាគារ Muzenze បាននិយាយប្រាប់ទីភ្នាក់ងារព័ត៌មានរ៉យទ័រថា អ្វីដែលធ្វើឲ្យលោកឈឺចាប់បំផុតគឺ ការឈឺចាប់របស់មនុស្ស ។ សូម្បីតែពួកគេគឺជាអ្នកទោស ក៏ពួកគេឈឺចាប់ដែរ ។ 

 លោកបន្តថា សាកសពទាំងនោះស្ថិតនៅទីនោះអស់រយៈពេលជាង ២សប្តាហ៍មកហើយ ហើយក្លិនអសោចរបស់វាមាននៅគ្រប់ទីកន្លែងទាំងអស់ ។ ពួកយើងប្រឈមនឹងជំងឺ ហើយកូនៗរបស់ពួកយើងដែលរត់លេងនៅជុំវិញទីនោះ ប្រឈមនឹងហានិភ័យខ្លាំងបំផុត ។

 នៅខេត្ត South Kivu ក្រុមអាជ្ញាធរ កំពុងសម្របសម្រួលជាមួយអង្គការមនុស្សធម៌ ដើម្បីលើកឡើងពីវិបត្តិកើនឡើង ការងារស្តាសណ្តាប់ធ្លាប់ឡើងវិញ ដើម្បីទប់ស្កាត់ការរីករាលដាលជំងឺ និងផ្តល់ការសង្រ្គោះបន្ទាន់ដល់សហគមន៍រងផលប៉ះពាល់ ។

 ជម្លោះមួយនេះដែរ បានធ្វើឲ្យកើតមានអស្ថិរភាពកាន់តែធ្ងន់ធ្ងរខ្លាំងនៅតំបន់ភាគខាងកើតកុងហ្គោ ជាទីដែលក្រុមប្រដាប់រាប់សិបក្រុម បានធ្វើសង្រ្គាមដណ្តើមគ្រប់គ្រងដែនដី និងធនធានរ៉ែ អស់រយៈពេលជាច្រើនទសវត្សរ៍មកហើយ ៕