នៅខេត្តភាគឦសាន Tak របស់ប្រទេសថៃមានចម្ងាយយ៉ាងឆ្ងាយពីទីក្រុងវ៉ាស៊ីនតោន គ្រួសារជនភៀសខ្លួនមីយ៉ាន់ម៉ា កំពុងរៀបចំពិធីបុណ្យសពសម្រាប់សមាជិកគ្រួសាររបស់ពួកគេ ពេលដែលការបង្កកជំនួយក្រៅប្រទេសរបស់ប្រធានាធិបតីសហរដ្ឋអាមេរិកលោក Donald Trump បានធ្វើឲ្យប៉ះពាល់ដល់តំបន់ក្រីក្របំផុតនៅលើពិភពលោក ។

អ៊ំស្រី Pe Kha Lau អាយុ ៧១ឆ្នាំ គឺជាជនភៀសខ្លួនមីយ៉ាន់ម៉ាមួយរូប បានសម្រាកព្យាបាលនៅក្នុងមន្ទីរពេទ្យផ្តល់មូលនិធិដោយសហរដ្ឋអាមេរិកតាមរយៈគណៈកម្មាធិការជួយសង្រ្គោះអន្តរជាតិ(IRC) ពេលដែលពួកគេបញ្ជាឲ្យបិទមន្ទីរពេទ្យមួយនេះ ។

គ្រួសាររបស់គាត់និយាយថា គាត់មានបញ្ហាសួត បានដកដង្ហើមផុតៗក្រោយគាត់ត្រូវបានបញ្ជូនមកកាន់ជំរំជនភៀសខ្លួនវិញ ហើយនិងបានស្លាប់រយៈពេល ៤ថ្ងៃក្រោយមក ។

យោងតាមការអះអាងរបស់ក្រុមការងារ និងក្រុមអ្នកស្រុក បានឲ្យដឹងថា IRC បានបិទមន្ទីរពេទ្យនៅតាមជំរំជាច្រើន កាលពីចុងខែមករាកន្លងទៅ ក្រោយទទួលបានការបញ្ជាឲ្យឈប់ធ្វើការពីក្រសួងការបរទេសសហរដ្ឋអាមេរិក ៕