ភ្លើងឆេះព្រៃឆាបឆេះយ៉ាងឆាប់រហ័សនៅជិតតំបន់ជនបទក្នុងឃុំ Collipulli ស្ថិតក្នុងតំបន់ Araucania ប្រទេសឈីលី កាន់តែឆាប់ឆេះលែងអាចគ្រប់គ្រងបាន ក្រោយពេលមានខ្យល់បក់ខ្លាំង ។

យោងតាមសេចក្តីរាយការណ៍ពីសារព័ត៌មានក្នុងស្រុក បានឲ្យដឹងថា ក្រុមភ្នាក់ងារពន្លត់អគ្គិភ័យ មន្រ្តីក្រុង ក្រុមនគរបាល និងរថយន្តដឹកទឹកឯកជន ត្រូវបានដាក់ពង្រាយដើម្បីព្យាយាមទប់ស្កាត់ភ្លើងឆេះព្រៃលែងអាចគ្រប់គ្រងបានមួយនេះ ។

ទោះបីជាយ៉ាងណាក៏ដោយ ពុំមានផ្ទះសម្បែងណាមួយរងផលប៉ះពាល់នោះទេ មកទល់នឹងពេលនេះ ហើយក្រុមអាជ្ញាធរ និយាយថា ក្រុមការងារពិបាកទប់ស្កាត់ដោយសារពួកគេអស់កម្លាំង ស្ថានភាពភូមិសាស្រ្តមានលក្ខណៈស្មុគស្មាញ និងទំហំធ៏ធំនៃភ្លើងឆេះព្រៃ ។

កាលពីថ្ងៃសៅរ៍ចុងសប្តាហ៍កន្លងទៅ ប្រធានាធិបតីឈីលីលោក Gabriel Boric បានប្រកាសបំរាមគោចរនៅក្នុងតំបន់ Araucania ដែលបំរាមគោចរនេះ បន្តបន្តរហូតដល់ថ្ងៃចន្ទ ដើម្បីជួយក្រុមអាជ្ញាធរ ក្នុងការពន្លត់ភ្លើងឆេះព្រៃ ៕