ប្រធានគណៈកម្មការអឺរ៉ុប លោកស្រី Ursula von der Leyen នៅថ្ងៃអង្គារ (ទី១១ ខែកុម្ភៈ) នេះ បានប្តេជ្ញាឲ្យមាននូវ «វិធានការយ៉ាងតឹងតែង និងសមស្រប» ដើម្បីឆ្លើយតបទៅនឹងការសម្រេចរបស់ប្រធានាធិបតីអាមេរិក លោក Donald Trump ក្នុងការដំឡើងពន្ធលើការនាំចូលដែកថែប និងអាលុយមីញ៉ូមទាំងអស់ ដែលធ្វើឲ្យការភ័យខ្លាចពីសង្គ្រាមពាណិជ្ជកម្មមានកាន់តែខ្លាំងឡើងៗ។

លោក Trump បានចុះហត្ថលេខាលើក្រឹត្យ កាលពីល្ងាចថ្ងៃទី១០ ខែកុម្ភៈ ដើម្បីប្រកាសពីការដំឡើងពន្ធលើការនាំចូលដែក និងអាលុយមីញ៉ូមទាំងអស់រហូតដល់ ២៥ភាគរយ ដោយគ្មានករណីលើកលែង ឬយោគយល់អ្វីឡើយ។ មន្ត្រីសេតវិមានម្នាក់ បានបង្ហើបឲ្យដឹងថា វិធានការនេះនឹងចូលជាធរមាន នៅថ្ងៃទី៤ ខែមីនា។

លោកស្រីបណ្ឌិត Von der Leyen បានឲ្យដឹងនៅក្នុងសេចក្តីថ្លែងការណ៍ថា លោកស្រីមានការសោកស្តាយយ៉ាងខ្លាំង ចំពោះការសម្រេចរបស់សហរដ្ឋអាមេរិក ដោយបានបន្ថែមថា ការដំឡើងពន្ធ គឺជាកាពត្វកិច្ចពន្ធដែលមិនផ្ដល់ផលដល់អាជីវកម្ម និងកាន់តែធ្វើឲ្យមានស្ថានភាពអាក្រក់ទៅៗ សម្រាប់អ្នកប្រើប្រាស់។

លោកស្រី បានបញ្ជាក់ថា៖ «ការដំឡើងពន្ធដែលមិនសមហេតុផលលើ EU នឹងមិនប្រព្រឹត្តទៅដោយមិនមានការឆ្លើយតបនោះឡើយ ពោលគឺការអនុវត្តនេះ នឹងបង្កឲ្យមានវិធានការតបតយ៉ាងតឹងតែង និងសមស្រប។ EU នឹងចាត់វិធានការ ដើម្បីការពារផលប្រយោជន៍របស់ប្លុក»។ តែយ៉ាងណាក្ដី លោកស្រីបណ្ឌិត Von der Leyen មិនបានផ្តល់សេចក្ដីលម្អិតនៃការឆ្លើយតបនោះឡើយ។

គួរបញ្ជាក់ថា ការនាំចេញដែកថែបរបស់ EU ទៅកាន់សហរដ្ឋអាមេរិក មានជាមធ្យមប្រហែល ៣ពាន់លានអឺរ៉ូ (៣,១០ពាន់លានដុល្លារ) ក្នុងមួយឆ្នាំ សម្រាប់រយៈពេលមួយទសវត្សរ៍កន្លងមកនេះ៕