ក្រសួងសុខាភិបាលអ៊ូហ្គង់ដា និយាយថា ចំនួនករណីឆ្លងជំងឺ Ebola នៅប្រទេសអ៊ូហ្គង់ដា បានកើនឡើងដល់ ៩នាក់ ក្នុងនោះមនុស្សម្នាក់ បានស្លាប់ ។

នៅក្នុងសេចក្តីថ្លែងការណ៍ដែលបានចេញផ្សាយកាលពីយប់ថ្ងៃចន្ទ ក្រសួងសុខាភិបាលអ៊ូហ្គង់ដា និយាយថា ករណីឆ្លងថ្មីនេះ អ្នកជំងឺ ៧នាក់ ទទួលបានការព្យាបាលនៅក្នុងមន្ទីរពេទ្យស្ថិតក្នុងរដ្ឋធានី Kampala និងអ្នកជំងឺម្នាក់ទៀត ទទួលបានការព្យាបាលនៅមន្ទីរពេទ្យស្ថិតក្នុងទីក្រុងភាគខាងកើត Mbale ជិតព្រំដែនប្រទេសកេនយ៉ា ។

ក្រសួងបន្តថា អ្នកជំងឺទាំង ៨នាក់ ស្ថិតក្នុងស្ថានភាពមិនបង្កគ្រោះថ្នាក់ដល់អាយុជីវិតនោះទេ ហើយអ្នកប្រាស្រ័យទាក់ទងជាមួយអ្នកជំងឺចំនួន ២៦៥នាក់ ត្រូវបានដាក់ឲ្យនៅដាច់ដោយឡែក ។

គួរឲ្យដឹងថា ប្រទេសអ៊ូហ្គង់ដា បានប្រកាសការរីករាលដាលជំងឺ Ebola ដែលជាជំងឺឆ្លងកម្រិតធ្ងន់ធ្ងរអាចបណ្តាលឲ្យមនុស្សស្លាប់បាន កាលពីចុងខែមុន ។

ការរីករាលឆ្លងចុងក្រោយនេះ បណ្តាលមកពីវីរុសនៅស៊ូដង់ ដែលគ្មានវ៉ាក់សាំងបង្ការត្រូវបានអនុម័តនោះទេ ។

យោងតាមការអះអាងរបស់អង្គការសុខភាពពិភពលោក(WHO) បានឲ្យដឹងថា រោគសញ្ញាជំងឺ Ebolaកើតមានចម្លោះពី ២ ទៅ ២១ថ្ងៃ ក្រោយការឆ្លង ហើយរោគសញ្ញាទាំងនោះ អាចរួមមានគ្រុនក្តៅ ឈឺក្បាលធ្ងន់ធ្ងរ ឈឺសាច់ដុំ អស់កម្លាំង ឈឺពោះ រាគ ក្អួតចង្អោរ និងចេញឈាមតាមច្រមុះ អញ្ចាញធ្មេញ ត្រចៀក និងភ្នែក ៕