អ្នកនាំពាក្យវិមានក្រឹមឡាំង លោក Dmitry Peskov នៅថ្ងៃអង្គារ (ទី១១ ខែកុម្ភៈ) នេះ បាននិយាយថា មិនមានអ្វីថ្មី ដែលត្រូវរាយការណ៍ អំពីការពិភាក្សាជាមួយសហរដ្ឋអាមេរិកនោះឡើយ ពាក់ព័ន្ធនឹងបញ្ហាអ៊ុយក្រែន។

លោក Peskov បានលើកឡើងជាថ្មីម្តងទៀតនូវសេចក្តីថ្លែងការណ៍ ដែលថា ទំនាក់ទំនង រវាងរដ្ឋបាលរបស់ប្រធានាធិបតីអាមេរិក លោក Donald Trump និងរុស្ស៊ី បានចាប់ផ្តើមក្នុងកម្រិតផ្សេងៗគ្នា ហើយបានរីកចម្រើនខ្លាំងឡើងៗ ប៉ុន្តែបាននិយាយថា មិនមានអ្វីដែលត្រូវឲ្យដឹងបន្ថែមនោះទេ សម្រាប់ពេលនេះទេ។

នៅពេលត្រូវបានសួរអំពីរបាយការណ៍មិនផ្លូវការណ៍ នៅលើកម្មវិធីផ្ញើសារ Telegram និងបណ្ដាញសង្គម X ដែលថា បេសកជនប្រចាំតំបន់មជ្ឈិមបូព៌ារបស់សហរដ្ឋអាមេរិក គឺលោក Steve Witkoff ប្រហែលជាបានធ្វើដំណើរទៅកាន់ទីក្រុងមូស្គូ លោក Peskov បានឆ្លើយថា លោកមិនមានព័ត៌មាន អំពីបញ្ហានេះទេ ហើយថា ក៏មិនមានកិច្ចប្រជុំជាមួយលោក នៅក្នុងរបៀបវារៈនោះដែរ។

នៅល្ងាចថ្ងៃអង្គារនេះ ទីភ្នាក់ងារ Rosaviatsia ដែលជានិយតករអាកាសចរណ៍របស់រុស្ស៊ី បានចេញសេចក្តីថ្លែងការណ៍ ដើម្បីជាការឆ្លើយតបទៅនឹងអ្វីដែលខ្លួនបានប្រាប់ថា ជាសំណួរ និងរបាយការណ៍របស់ប្រព័ន្ធផ្សព្វផ្សាយ បន្ទាប់ពីសេវាតាមដានជើងហោះហើរ បានបង្ហាញពីយន្តហោះឯកជនចុះចតនៅទីក្រុងមូស្គូ ដែលធ្វើដំណើរពីសហរដ្ឋអាមេរិក។

និយតករ បានប្រាប់ឲ្យដឹងថា វាគឺជាជើងហោះហើរបច្ចេកទេសតែមួយជើងពីទីក្រុងវ៉ាស៊ីនតោនទៅកាន់ទីក្រុងមូស្គូ ទាក់ទងនឹង «កិច្ចសហប្រតិបត្តិការមនុស្សធម៌» ដែលផ្ដោតលើវេជ្ជសាស្រ្ត។ តែទីភ្នាក់ងារមិនបានបង្ហាញព័ត៌មានលម្អិតនៃជើងហោះហើរនេះ ឬអត្តសញ្ញាណអ្នកជិះយន្តហោះនោះទេ។

ដោយឡែកលោកស្រី Lynne Tracy ឯកអគ្គរដ្ឋទូតអាមេរិកប្រចាំទីក្រុងមូស្គូ នៅថ្ងៃអង្គារនេះ បានជួបពិភាក្សាជាមួយអនុរដ្ឋមន្ត្រីការបរទេសរុស្ស៊ី លោក Sergei Ryabkov។ ហើយបើយោងតាមលោកស្រី Maria Zakharova អ្នកនាំពាក្យក្រសួងការបរទេសរុស្ស៊ី បានឲ្យដឹងថា លោកស្រី Tracy និងលោក Ryabkov បានជជែកគ្នា អំពីប្រតិបត្តិការរបស់ស្ថាប័នការទូតរុស្ស៊ី នៅបរទេស៕