ម៉ិកស៊ិក កាណាដា និងសហភាពអឺរ៉ុបកាលពីថ្ងៃអង្គារ១១ ខែកុម្ភៈបានថ្កោលទោសការសម្រេចចិត្តរបស់ប្រធានាធិបតីអាមេរិក Donald Trump ក្នុងការដំឡើងពន្ធនាំចូលដែកថែប និងអាលុយមីញ៉ូមទាំងអស់នៅខែក្រោយ ជាចំណាត់ការដែលបានធ្វើឱ្យមានក្ដីបារម្ភពីការផ្ទុះសង្គ្រាមពាណិជ្ជកម្ម។

លោក Trump បានចុះហត្ថលេខាលើសេចក្តីប្រកាសកាលពីល្ងាចថ្ងៃចន្ទសប្ដាហ៍នេះដោយបង្កើនអត្រាពន្ធរបស់សហរដ្ឋអាមេរិកលើអាលុយមីញ៉ូមដល់ ២៥%ពីលើអត្រាពន្ធមានស្រាប់១០% ដោយគ្មានការលើកលែងប្រទេសណាមួយឡើយ និងកិច្ចព្រមព្រៀងកូតាដែលត្រូវកំណត់ការយកពន្ធ។

វិធានការួទាំងនេះដែលនឹងចូលជាធរមាននៅថ្ងៃទី ១២ ខែមីនា នឹងអនុវត្តលើការនាំចូលដែកថែប និងអាលុយមីញ៉ូមរាប់លានតោនពីប្រទេសកាណាដា ប្រេស៊ីល ម៉ិកស៊ិក កូរ៉េខាងត្បូង និងប្រទេសផ្សេងទៀតដែលបានចូលសហរដ្ឋអាមេរិកដោយរួចពន្ធ។

រដ្ឋមន្ត្រីសេដ្ឋកិច្ចម៉ិកស៊ិកលោក Marcelo Ebrard បានហៅការសម្រេចចិត្តពន្ធនេះថា មិនសមហេតុផលនិងអយុត្តិធម៌។ លោកពុំបាននិយាយថា តើម៉ិកស៊ិកមានគម្រោងដំឡើងពន្ធទៅវិញទៅមកលើដែកថែប ឬអាលុយមីញ៉ូមដែលខ្លួននាំចូលពីសហរដ្ឋអាមេរិកឬយ៉ាងណានោះទេ។

នាយករដ្ឋមន្ត្រីកាណាដាលោក Justin Trudeau បាននិយាយថា ការដំឡើងពន្ធនេះគឺមិនអាចទទួលយកបាន។ លោកបាននិយាយនៅឯកិច្ចប្រជុំកំពូលបញ្ញាសិប្បនិម្មិតAIក្នុងទីក្រុងប៉ារីសថា ការឆ្លើយតបរបស់កាណាដា ប្រសិនបើចាំបាច់ មានភាពរឹងមាំ និងច្បាស់លាស់។

ប្រធានគណៈកម្មការអឺរ៉ុបលោកស្រី Ursula von der Leyen បានចូលរួមថ្កោលទោសដោយនិយាយថាប្លុក ២៧ប្រទេសនេះ នឹងចាត់វិធានការយ៉ាងម៉ឺងម៉ាត់និងសមាមាត្រ។ ជាមួយគ្នានោះអនុប្រធានាធិបតីអាមេរិកលោក JD Vance បាននិយាយថា លោកក៏បានពិភាក្សាពីបញ្ហាពាណិជ្ជកម្ម និងសេដ្ឋកិច្ចជាមួយលោកលោកស្រី Von der Leyen ក្នុងកិច្ចប្រជុំកំពូល AI នៅទីក្រុងប៉ារីសកាលពីថ្ងៃអង្គារសប្ដាហ៍នេះដែរ៕