បុគ្គលិកសហជីព កាលពីថ្ងៃអង្គារ (ទី១១ ខែកុម្ភៈ) បានប្រមូលផ្តុំគ្នា នៅវិមាន Capitol Hill ដោយមានការចូលរួមពីបណ្ដាមេដឹកនាំខាងគណបក្សប្រជាធិបតេយ្យ ដើម្បីតវ៉ាជំទាស់នឹងផែនការរបស់ប្រធានាធិបតី Donald Trump ក្នុងការកាត់បន្ថយបុគ្គលិក និងបន្ថយទំហំរដ្ឋាភិបាលសហព័ន្ធ។

មេដឹកនាំសំឡេងភាគតិចរបស់សភាតំណាងរាស្ត្រ លោក Hakeem Jeffries និងសមាជិកព្រឹទ្ធសភារដ្ឋ Maryland លោកស្រី Angela Alsobrooks បានចូលរួមជាមួយបណ្ដាមេដឹកនាំនៃសហព័ន្ធបុគ្គលិករដ្ឋាភិបាលអាមេរិក (AFGE) និង AFL-CIO (សហព័ន្ធការងារអាមេរិក និងសភានៃអង្គការឧស្សាហកម្ម) នៅក្បែរវិមានកាពីតូល ដោយអំពាវនាវឲ្យសភាការពារការងាររដ្ឋប្បវេណីសហព័ន្ធ និងការពារបុគ្គលិកពីការជ្រៀតជ្រែកផ្នែកនយោបាយ។

ជាមួយគ្នានេះ សមាជិកសហជីពក៏បានតវ៉ាផងដែរ ប្រឆាំងនឹងការគ្រប់គ្រងរបស់លោកមហាសេដ្ឋី Elon Musk នៅការិយាល័យរដ្ឋាភិបាលក្រៅផ្លូវការ ដែលជាក្រសួងប្រសិទ្ធភាពរដ្ឋាភិបាល (DOGE) បង្កើតឡើងដោយប្រធានាធិបតីលោក Trump។

AFGE បានដាក់ពាក្យបណ្តឹង ដើម្បីរារាំងកម្មវិធីរបស់ DOGE ដែលផ្តល់ប្រាក់បំណាច់រយៈពេល ៧ខែដល់បុគ្គលិករដ្ឋាភិបាលដែលយល់ព្រមលាលែងពីតំណែង។ ចៅក្រមសហព័ន្ធ បានផ្អាកកម្មវិធីនេះដោយមិនកំណត់ពេលវេលា ដោយរង់ចាំសវនាការ៕