រដ្ឋមន្ត្រីការពារជាតិសហរដ្ឋអាមេរិក លោក Pete Hegseth បាននិយាយកាលពីថ្ងៃអង្គារ (១១ កុម្ភៈ) ថា ទីក្រុងវ៉ាស៊ីនតោននឹងមិនបញ្ជូនកងទ័ពរបស់ខ្លួនទៅកាន់ប្រទេសអ៊ុយក្រែនទេ ខណៈទីក្រុងគីវ ឥឡូវនេះជិតដល់ថ្ងៃខួបលើកទីបីនៃសង្រ្គាមជាមួយរុស្ស៊ី។

លោក Hegseth បានប្រាប់អ្នកយកព័ត៌មាននៅទីក្រុង Stuttgart របស់អាល្លឺម៉ង់ថា "រដ្ឋបាលរបស់លោកប្រធានាធិបតី Donald Trump នឹងមិនបញ្ជូនទាហានអាមេរិកទៅអ៊ុយក្រែនទេ" ខណៈប្រធានមន្ទីរបញ្ចកោណរូបនេះកំពុងចុះសួរសុខទុក្ខមេដឹកនាំយោធាជាន់ខ្ពស់នៅទីស្នាក់ការកណ្តាលរបស់បញ្ជាការអឺរ៉ុប និងបញ្ជាការទ្វីបអាហ្រ្វិករបស់សហរដ្ឋអាមេរិក ក៏ដូចជាសមាជិកយោធាដែលឈរជើងនៅអាល្លឺម៉ង់។

ដំណើរសំចតបន្ទាប់របស់លោក Hegseth គឺទីក្រុងប្រ៊ុចសែល ជាទីដែលលោកនឹងចូលរួមកិច្ចប្រជុំរដ្ឋមន្ត្រីការពារជាតិណាតូ និងកិច្ចប្រជុំក្រុមទំនាក់ទំនងការពារជាតិអ៊ុយក្រែន។

នៅឯកិច្ចប្រជុំរដ្ឋមន្ត្រីអង្គការណាតូលើកដំបូងរបស់ខ្លួនជាមួយសមភាគីសម្ព័ន្ធមិត្ត ប្រមុខការពារជាតិអាមេរិករូបនេះនឹងចូលរួមជាមួយសម្ព័ន្ធមិត្ត និងដៃគូសម្ព័ន្ធយោធាណាតូ ដើម្បីពិភាក្សាអំពីតម្រូវការក្នុងការជំរុញការចំណាយលើវិស័យការពារជាតិរបស់សម្ព័ន្ធមិត្ត បង្កើនការដឹកនាំរបស់អឺរ៉ុប និងពង្រីកសមត្ថភាពមូលដ្ឋានឧស្សាហកម្មការពារជាតិនៅលើភាគីទាំងពីរនៃមហាសមុទ្រអាត្លង់ទិក៕