ជនជាតិដាណឺម៉ាកជាង ២០០.០០០នាក់ បានចុះហត្ថលេខាលើញត្តិតាមប្រព័ន្ធអ៊ិនធឺណិត ដើម្បីទិញរដ្ឋកាលីហ្វ័រញ៉ាពីសហរដ្ឋអាមេរិក ហើយប្តូរឈ្មោះរដ្ឋនេះថា «New Denmark» (ដាណឺម៉ាកថ្មី)។

ការស្នើនេះកើតមានឡើងបន្ទាប់ពីប្រធានាធិបតីអាមេរិក លោក Donald Trump បានបង្ហាញការចាប់អារម្មណ៍ជាថ្មី ក្នុងការទិញយក Greenland ដែលជាដែនដីស្វយ័តរបស់ដាណឺម៉ាក ដើម្បីឲ្យវាក្លាយជាផ្នែកមួយរបស់សហរដ្ឋអាមេរិក ចាប់តាំងពីបានជាប់ឆ្នោតឡើងវិញ នៅក្នុងខែវិច្ឆិកា ឆ្នាំ២០២៤។

ញត្តិដែលមានចំណងជើងថា «Make California Great Again» (ធ្វើឲ្យកាលីហ្វ័រញ៉ាអស្ចារ្យម្ដងទៀត) សន្យាថា នឹងណែនាំនូវឧត្តមគតិរបស់ដាណឺម៉ាក ពោលគឺការបង្កើតបរិយាកាសយ៉ាងកក់ក្ដៅ នៅហូលីវូដ ផ្លូវសម្រាប់ជិះកង់ នៅ Beverly Hills និងនំសាំងវិចបែបដាណឺម៉ាក នៅគ្រប់ជ្រុងផ្លូវទាំងអស់។

ញត្តិនោះរៀបរាប់ថា៖ «តើអ្នកធ្លាប់មើលផែនទី ហើយគិតថា តើអ្នកបានដឹងពីអ្វីដែលដាណឺម៉ាកត្រូវការទេ? ពន្លឺថ្ងៃកាន់តែច្រើន ដើមត្នោត និងជិះស្គីលើទឹកកក។ មែនហើយ យើងមានឱកាសម្តងក្នុងមួយជីវិត ដើម្បីធ្វើឲ្យសុបិននោះក្លាយជាការពិត។ តោះទៅទិញរដ្ឋកាលីហ្វ័រញ៉ាពីលោក Donald Trump!»។

គោលបំណង គឺដើម្បីប្រមូលហត្ថលេខាចំនួន ៥០០.០០០នាក់ និងថវិកាចំនួន ១សែនកោដិដុល្លារ ប៉ុន្តែញត្តិនេះ គឺគ្រាន់តែប្រមូលហត្ថលេខាប៉ុណ្ណោះ មិនមែនការបរិច្ចាគទឹកប្រាក់នោះទេ។

ញត្តិនេះ បានកត់សម្គាល់ថា លោក Trump ប្រហែលជាបើកផ្លូវឲ្យមានកិច្ចព្រមព្រៀង ដោយពិចារណាលើការមិនចុះសម្រុងជាមួយអ្នកនយោបាយនៅរដ្ឋកាលីហ្វ័រញ៉ា៕