ទាំងកម្មវិធីផែនទី Apple Maps និង Bing Maps បានចូលរួមជាមួយក្រុមហ៊ុន Google ដោយការផ្លាស់ប្តូរកម្មវិធី និងកម្មវិធីផែនទីរបស់ពួកគេ ដើម្បីបង្ហាញឈូងសមុទ្រអាមេរិក នៅតំបន់ដែនទឹកដ៏ធំ ដែលត្រូវបានគេស្គាល់ថា ជាឈូងសមុទ្រម៉ិកស៊ិក តាំងពីសតវត្សរ៍ទី១៦ មក។

គួរបញ្ជាក់ថា ក្រុមហ៊ុន Google បានចាប់ផ្តើមធ្វើការផ្លាស់ប្តូរ កាលពីថ្ងៃទី១០ ខែកុម្ភៈ ហើយក្រុមហ៊ុន Apple មួយថ្ងៃក្រោយមក គឺនៅថ្ងៃទី១១ ខែកុម្ភៈ។ កម្មវិធីផែនទី Bing របស់ក្រុមហ៊ុន Microsoft មិនបានធ្វើការផ្លាស់ប្តូរនេះទេ គិតត្រឹមម៉ោងធ្វើសន្និសីទសារព័ត៌មាន ប៉ុន្តែអ្នកនាំពាក្យរបស់ក្រុមហ៊ុន Microsoft បានបញ្ជាក់ថា កម្មវិធីនេះ កំពុងដំណើរការហើយ។

អ្នកនាំពាក្យក្រុមហ៊ុន Microsoft បានឲ្យដឹងនៅក្នុងសេចក្តីថ្លែងការណ៍ថា៖ «យើងប្តេជ្ញាផ្តល់ជូនអ្នកប្រើប្រាស់នូវព័ត៌មានត្រឹមត្រូវ និងទាន់សម័យ។ ដោយអនុលោមតាមគោលការណ៍ផលិតផលដែលត្រូវបានបង្កើតឡើង យើងកំពុងធ្វើបច្ចុប្បន្នភាពកម្មវិធីផែនទី Bing ដើម្បីឆ្លុះបញ្ចាំងពីបញ្ជីឈ្មោះរបស់ប្រព័ន្ធព័ត៌មានភូមិសាស្ត្រ នៅសហរដ្ឋអាមេរិក ដែលរួមមានការផ្លាស់ប្តូរឈូងសមុទ្រម៉ិកស៊ិក ទៅជាឈូងសមុទ្រអាមេរិក នៅក្នុងសហរដ្ឋអាមេរិក»។

ការផ្លាស់ប្តូរនេះ មិនត្រូវបានរួមបញ្ចូលដោយរលូន សម្រាប់គេហទំព័រផែនទីណាមួយ នៅឡើយទេ។ ការវាយពាក្យ «ឈូងសមុទ្រ» នៅក្នុង Google Maps នៅតែវិលទៅរកពាក្យ «ឈូងសមុទ្រម៉ិកស៊ិក» នៅក្នុងលទ្ធផលស្វែងរក ប៉ុន្តែការជ្រើសរើសនេះ នាំអ្នកប្រើប្រាស់ទៅរកដែនទឹក ដោយមានឈ្មោះឈូងសមុទ្រអាមេរិក។ 

នៅក្នុងកម្មវិធី Apple Maps ការវាយពាក្យឈូងសមុទ្រ នាំអ្នកប្រើប្រាស់ទៅកាន់ផែនទីនៃតំបន់នោះ ហើយប្តូរឃ្លាស្វែងរកទៅជា «Gulf of America» (ឈូងសមុទ្រអាមេរិក)។ គិតត្រឹមរសៀលថ្ងៃអង្គារ កម្មវិធី Bing Maps នៅតែវិលទៅរកពាក្យឈូងសមុទ្រម៉ិកស៊ិក ប៉ុន្តែសេចក្តីថ្លែងការណ៍របស់ក្រុមហ៊ុនបង្ហាញថា ខ្លួននឹងធ្វើបានឆាប់ៗនេះ៕