ប្រធានាធិបតីឥណ្ឌូនេស៊ី លោក Prabowo Subianto និងប្រធានាធិបតីទួរគី លោក Recep Tayyip Erdogan បានជួបពិភាក្សាគ្នា នៅថ្ងៃពុធ (ទី១២ ខែកុម្ភៈ) នេះ ដោយបានចុះហត្ថលេខាលើកិច្ចព្រមព្រៀងបន្តបន្ទាប់ ដើម្បីលើកកម្ពស់ទំនាក់ទំនងពាណិជ្ជកម្ម និងការពារជាតិ រវាងប្រទេសដែលកាន់សាសនាឥស្លាមដោយភាគច្រើន ក្នុងនោះរួមទាំងការបណ្តាក់ទុនរួមគ្នា ដើម្បីផលិតយានដ្រូនផងដែរ។

គួរបញ្ជាក់ថា មេដឹកនាំទួរគី កំពុងធ្វើទស្សនកិច្ច នៅប្រទេសសេដ្ឋកិច្ចដ៏ធំបំផុតរបស់អាស៊ីអាគ្នេយ៍ បន្ទាប់ពីធ្វើដំណើរទៅប្រទេសម៉ាឡេស៊ី និងមុនពេលធ្វើដំណើរទៅប្រទេសប៉ាគីស្ថាន សម្រាប់ដំណើររយៈពេល ៤ថ្ងៃ ទៅកាន់ប្រទេសជាសម្ព័ន្ធមិត្តសំខាន់ៗ នៅក្នុងពិភពអ្នកកាន់សាសនាឥស្លាម។

លោក Erdogan ត្រូវបានស្វាគមន៍ នៅឯវិមានប្រធានាធិបតី ក្នុងទីក្រុង Bogor ដែលជាទីក្រុងនៅភាគខាងត្បូងនៃរដ្ឋធានីហ្សាការតា។

លោក Prabowo បាននិយាយបន្ទាប់ពីកិច្ចពិភាក្សាជាមួយលោក Erdogan ថា៖ «យើងប្តេជ្ញាបង្កើនពាណិជ្ជកម្ម រវាងប្រទេសទាំង២ ដែលផ្តល់ផលប្រយោជន៍ឲ្យគ្នាទៅវិញទៅមក។ យើងក៏បានព្រមព្រៀងគ្នា ក្នុងការបង្កើនផលិតកម្មរួម និងកិច្ចសហប្រតិបត្តិការ ក្នុងឧស្សាហកម្មការពារជាតិផងដែរ»។

លោក Prabowo បានបន្ថែមថា ក៏នឹងមានបញ្ចូលការហ្វឹកហ្វឺនរួមគ្នា សម្រាប់ទាហាន និងកិច្ចសហការកាន់តែជិតស្និទ្ធ ស្ដីពីការប្រយុទ្ធប្រឆាំងភេរវកម្ម និងចារកម្ម។

ក្រោមសក្ខីភាពដ៏សំខាន់ពីមេដឹកនាំទាំង២ កិច្ចព្រមព្រៀងជាច្រើន ស្តីពីពាណិជ្ជកម្ម ថាមពល ការអប់រំឧត្តមសិក្សា និងកិច្ចការសាសនា ត្រូវបានចុះហត្ថលេខាដោយរដ្ឋមន្ត្រី និងមន្ត្រី ក្នុងនោះរួមទាំងកិច្ចព្រមព្រៀងផលិតយានដ្រូន នៅក្នុងប្រទេសឥណ្ឌូនេស៊ីផងដែរ៕