ទូរទស្សន៍រដ្ឋ CCTVរាយការណ៍ថា នៅថ្ងៃពុធនេះ យោធាចិន បានដាក់ពង្រាយកងទ័ពជើងទឹក និងកងទ័ពអាកាសនៅជុំវិញកោះតៃវ៉ាន់សម្រាប់ការល្បាតត្រៀមខ្លួនប្រយុទ្ធ និងបេសកកម្មហ្វឹកហាត់ ។

រូបភាពវីដេអូឃ្លីបរបស់ CCTV ឃើញនាវាកងទ័ពជើងទឹកចិនដែលដាក់ពង្រាយដោយកងបញ្ជាការភូមិភាគកើត ធ្វើដំណើរឆ្លងកាត់សមុទ្រ ហើយយន្តហោះចម្បាំងហោះឡើងចេញពីនាវាចម្បាំង ។

នៅថ្ងៃពុធនេះដែរ យោធាប្រទេសចិន បានរិះគន់សហរដ្ឋអាមេរិក ថាបង្កើនហានិភ័យសន្តិសុខនៅច្រកសមុទ្រតៃវ៉ាន់ បន្ទាប់ពីនាវាកងទ័ពជើងទឹកអាមេរិក ២គ្រឿងបានធ្វើដំណើរឆ្លងកាត់ច្រកសមុទ្រដ៏រសើបក្នុងសប្តាហ៍នេះជាលើកដំបូង ចាប់តាំងពីលោកប្រធានាធិបតី Donald Trump ចូលកាន់តំណែងកាលពីខែមុនមក ។

កងទ័ពជើងទឹកសហរដ្ឋអាមេរិកអមដោយនាវាមកពីប្រទេសសម្ព័ន្ធមិត្ត តែងតែឆ្លងកាត់ច្រកសមុទ្រប្រហែលម្តងក្នុង ១ខែ។ 

ប្រទេសចិន ដែលប្រកាសសិទ្ធិកោះតៃវ៉ាន់ថាជាដែនដីរបស់ខ្លួននោះ បាននិយាយថាផ្លូវទឹកយុទ្ធសាស្ត្រនេះ គឺជារបស់ខ្លួន ។

ខណៈពេលនោះដែរ ក្រសួងការពារជាតិកោះតៃវ៉ាន់ និយាយថា កងកម្លាំងរបស់ពួកគេ បន្តឃ្លាំមើលសកម្មភាពយោធារបស់ខិន ប៉ុន្តែពួកគេកត់សំគាល់ឃើញថា ស្ថានភាពមានលក្ខណៈដូចធម្មតាទេ ៕