អ្នកស្រី Sudila Mwembo គឺជាគ្រូបង្រៀនមួយរូបនៅសាលារៀន Mama Mulez ស្ថិតក្នុងទីក្រុង Goma ប្រទេសកេនយ៉ា បាននិយាយថា កាលពីមុនសាលារៀនរបស់លោកមានសិស្ស ១.២០០នាក់ ប៉ុន្តែបច្ចុប្បន្នមានសិស្សត្រឹមតែ ២៣នាក់ប៉ុណ្ណោះ ។

ការប៉ះទង្គិចគ្នារវាងក្រុមឧទ្ទាម M23 និងកងកម្លាំងកុងហ្គោ បណ្តាលឲ្យពលរដ្ឋជម្លៀសខ្លួនភ័យខ្លាចក្នុងការបញ្ជូនកូនៗរបស់ពួកគេមកចូលរៀនវិញ ។

អ្នកស្រី Mwembo និយាយថា ពួកយើងស្ទើរតែបញ្ចប់ការប្រឡងទៅហើយ ពេលដែលការប្រយុទ្ធគ្នាបានផ្ទុះឡើង ប៉ុន្តែបច្ចុប្បន្នឪពុកម្តាយសិស្សបានប្រាប់ឲ្យកូនៗរបស់ពួកគេលាក់ខ្លួន ដូច្នេះហើយទើបគ្មានសិស្សត្រឡប់មកកាន់សាលារៀនវិញបែបនេះ ។

បើទោះបីជាមានការអំពាវនាវពីក្រុមឧទ្ទាម M23 ឲ្យសាលាចាប់ផ្តើមបង្រៀនសិស្សធម្មតាវិញយ៉ាងណាក្តី ភាពពុំច្បាស់លាស់នៅតែកើតមានដដែលនៅក្នុងចំណោមគ្រួសារជាច្រើន ។

ខណៈពេលនោះដែរ ក្រុមស្ម័គ្រចិត្តនៃគណៈកម្មាធិការកាកបាទក្រហមអន្តរជាតិ(ICRC) បំពាក់ដោយឧបករណ៍ការពារ បានយកសាកសពស្អុយរលួយចេញពីពន្ធនាគារ Muzenze ស្ថិតក្នុងទីក្រុង Goma ប្រទេសកេនយ៉ា រយៈពេល ២សប្តាហ៍ ក្រោយការប៉ះទង្គិចគ្នារវាងក្រុមឧទ្ទាម M23 និងកងទ័ពកុងហ្គោ ដែលនាំឲ្យមានការរត់គេចអ្នកទោសទ្រង់ទ្រាយធំ ។

ដោយឡែក នៅខេត្ត South Kivu ក្រុមអាជ្ញាធរ កំពុងសម្របសម្រួលជាមួយអង្គការមនុស្សធម៌ ដើម្បីលើកឡើងពីវិបត្តិកើនឡើង ការងារស្តាសណ្តាប់ធ្លាប់ឡើងវិញ ដើម្បីទប់ស្កាត់ការរីករាលដាលជំងឺ និងផ្តល់ការសង្រ្គោះបន្ទាន់ដល់សហគមន៍រងផលប៉ះពាល់ ។

 ជម្លោះមួយនេះដែរ បានធ្វើឲ្យកើតមានអស្ថិរភាពកាន់តែធ្ងន់ធ្ងរខ្លាំងនៅតំបន់ភាគខាងកើតកុងហ្គោ ជាទីដែលក្រុមប្រដាប់រាប់សិបក្រុម បានធ្វើសង្រ្គាមដណ្តើមគ្រប់គ្រងដែនដី និងធនធានរ៉ែ អស់រយៈពេលជាច្រើនទសវត្សរ៍មកហើយ ៕