អ្នកជំងឺមហារីកប៉ាឡេស្ទីន បានចាប់ផ្តើមទទួលបានការព្យាបាលនៅប្រទេសអេហ្ស៊ីប ក្រោយជម្លៀសចេញពីតំបន់ហ្កាហ្សា ស្របពេលដែលក្តីបារម្ភពីបទឈប់បាញ់ដួលរលំកើនឡើងនោះ ។

 នៅមន្ទីរពេទ្យអគ្គ Arish អ្នកស្រី Iman Haroun គឺជាជនប៉ាឡេស្ទីនមួយរូបឈរនៅជាប់កូនស្រីអាយុ ១ខួបកន្លះរបស់គាត់ ដែលមានជំងឺមហារីកគ្រាប់ឈាម ។

 អ្នកស្រី Haroun និយាយថា អស់រយៈពេល ៥ខែមកហើយដែលកូនស្រី Rasha របស់គាត់ពុំទទួលបានការព្យាបាលនៅក្នុងតំបន់ហ្កាហ្សា ។ កូនស្រីរបស់គាត់រងគ្រោះច្រើនណាស់ ពេលដែលនាងត្រូវការបញ្ចូលឈាម ប្លាកែត និងប្លាស្មា ។ ការថតបង្ហាញថា កូនស្រីរបស់គាត់មានបញ្ហាតម្រងនោមផងដែរ ។

 យោងតាមការអះអាងរបស់អភិបាលខេត្តស៊ីណៃខាងជើងលោក Khaled Megawer បានឲ្យដឹងថា អ្នកជម្លៀសខ្លួនផ្នែកវេជ្ជសាស្រ្តប៉ាឡេស្ទីន ត្រូវបានអនុញ្ញាតឲ្យមានអ្នករួមដំណើរ ៣នាក់ ដោយអាស្រ័យលើស្ថានភាពរបស់អ្នកជំងឺ ។

 ពាក់ព័ន្ធនឹងអនុសាសន៍របស់ប្រធានាធិបតីសហរដ្ឋអាមេរិកលោក Donald Trump ពីការជម្លៀសពលរដ្ឋហ្កាហ្សាចេញទៅកាន់ប្រទេសអេហ្ស៊ីប និងហ៊្សកដានី អ្នកស្រី Manal al-Khaldi ដែលបានធ្វើដំណើរមកជាមួយកូនស្រីរបស់គាត់ដើម្បីព្យាបាលនៅប្រទេសអេហ្ស៊ីប និយាយថា អ្នកស្រីនឹងមិនផ្លាស់ចេញពីតំបន់ហ្កាហ្សានោះទេ ។

 អ្នកស្រី និយាយថា លោក Trumpអាចសម្លាប់ពួកយើងបាននៅក្នុងដែនដីរបស់ពួកយើង ប៉ុន្តែវាមិនអាចទៅរួចនោះទេដែលលោកចង់ឲ្យពួកយើងចាកចេញពីទីកន្លែងកំណើតរបស់ពួកយើងនោះ ។

 នាយករដ្ឋមន្រ្តីអ៊ីស្រាអែលលោក Benjamin Netanyahu បានប្រកាសកាលពីថ្ងៃអង្គារថា បទឈប់បាញ់នៅតំបន់ហ្កាហ្សា នឹងត្រូវបញ្ចប់ ហើយយោធានឹងចាប់ផ្តើមប្រយុទ្ធជាមួយក្រុមហាម៉ាស់វិញ រហូតដល់ពួកគេចុះចាញ់ បើសិនជាក្រុមជីវពលមួយនេះ ពុំព្រមដោះលែងចំណាប់ថ្នូរនៅរសៀលថ្ងៃសៅរ៍ខាងមុខនេះទេនោះ ៕