ក្រុមមន្រ្តីជាន់ខ្ពស់អារ៉ាប់ និយាយនៅថ្ងៃពុធនេះថា ផែនការរបស់ប្រធានាធិបតីសហរដ្ឋអាមេរិកលោក Donald Trump ក្នុងការគ្រប់គ្រងតំបន់ហ្កាហ្សា និងបំផ្លាស់ទីជនប៉ាឡេស្ទីនទៅកាន់កន្លែងផ្សេងដែលធ្វើឲ្យកើតមានការថ្កោលទោសសកលនោះ នឹងគំរាមកំហែងដល់បទឈប់បាញ់ដ៏ផុយស្រួយនៅក្នុងតំបន់មួយនេះ ហើយនិងបង្កឲ្យមានអស្ថិរភាពក្នុងតំបន់ ។

លោក Ahmed Aboul Gheit គឺជាអគ្គរដ្ឋលេខាធិការក្រុមសម្ព័ន្ធអារ៉ាប់ បានព្រមាននៅកិច្ចប្រជុំកំពូលរដ្ឋាភិបាលពិភពលោកក្នុងទីក្រុង Dubaiថា បើសិនជាលោក Trumpជំរុញបន្តផែនការរបស់លោក លោកនឹងនាំតំបន់មជ្ឈិមបូព៌ាធ្លាក់ចូលក្នុងវដ្តវិបត្តិថ្មី ធ្វើឲ្យមានឥទ្ធិពលអវិជ្ជមានដល់សន្តិភាព និងស្ថិរភាព ក្នុងតំបន់ ។

លោកTrumpបានធ្វើឲ្យពិភពអារ៉ាប់ខឹងសម្បារយ៉ាងខ្លាំង តាមរយៈការប្រកាសពុំរំពឹងទុកថា សហរដ្ឋអាមេរិកនឹងគ្រប់គ្រងតំបន់ហ្កាហ្សា ផ្តល់ទីលំនៅថ្មីដល់ជនប៉ាឡេស្ទីនជាង ២លាននាក់ ហើយនិងអភិវឌ្ឍតំបន់មួយនេះឲ្យក្លាយជា “តំបន់ឆ្នេរលំហែរកាយមជ្ឈិមបូព៌ា” ។

លោក Aboul Gheit និយាយថា បើសិនជាស្ថានភាពផ្ទុះផ្នែកយោធាម្តងទៀត បទឈប់បាញ់ទាំងនេះ នឹងត្រូវអសារបង់ ។

ខណៈពេលនោះដែរ លោក Jasem al-Budaiwi ដែលជាប្រធានក្រុមប្រឹក្សាកិច្ចសហប្រតិបត្តិការឈូងសមុទ្រដែលជាសម្ព័ន្ធសេដ្ឋកិច្ច និងនយោបាយបណ្តាប្រទេសអ្នកមានដោយសារប្រេង បានអំពាវនាវឲ្យលោក Trumpចងចាំទំនាក់ទំនងខ្លាំងក្លារវាងតំបន់មួយនេះ និងទីក្រុងវ៉ាស៊ីងតោន ៕